სახელმწიფო უკომპრომისოა ორგანიზებული ნარკოდანაშაულისა და ნარკოგამსაღებლების მიმართ ბრძოლაში. სამართალდამცავთა ძალისხმევა მიმართულია იმისკენ, რომ ქვეყანაში მავნე და საშიში ნივთიერებების გავრცელება მაქსიმალურად იყოს აღკვეთილი და ნარკოტიკებით უკანონო ვაჭრობის თითოეულ ფაქტს უმკაცრესი რეაგირება მოჰყვეს.
შინაგან საქმეთა სამინისტრომ მხოლოდ ბოლო 4 თვეში, მთელი ქვეყნის მასშტაბით, სხვადასხვა დროს ჩატარებული ოპერატიულ-საგამოძიებო ღონისძიებების შედეგად, უკანონო ბრუნვიდან დიდი მოცულობის სხვადასხვა სახის ნარკოტიკული საშუალება, ახალი ფსიქოაქტიური და ფსიქოტროპული ნივთიერება ამოიღო.
ამავე პერიოდში, ნარკოდანაშაულისთვის პასუხისგებაში მიცემულია 754 პირი, მათ შორის 394 პირი დიდი და განსაკუთრებით დიდი ოდენობით ნარკოტიკული საშუალების უკანონო შეძენა-შენახვის, ასევე, რეალიზაციის ბრალდებით დააკავეს.
ამავე დროს, საპარლამენტო გუნდი მთავრობასთან ერთად მუშაობს ნარკოპოლიტიკის ისეთ მოდელზე, რომელიც გასაღების წინააღმდეგ უკომპრომისო და კიდევ უფრო ეფექტიანად ბრძოლაზე იქნება ორიენტირებული, ამავე დროს დამოკიდებულ პირებს მიაწვდის შესაბამის სერვისებს.
სამწუხაროდ, დღეისათვის, მთელ მსოფლიოში სხვადასხვა ტიპის ნარკოტიკების შეძენა თანამედროვე ტექნოლოგიების გამოყენებით სულ უფრო მარტივი ხდება, ხოლო მასთან ბრძოლა სულ უფრო რთულდება. შესაბამისად, ეს არა მარტო საქართველოს, არამედ მსოფლიო გამოწვევაა.
ამ რთული გამოწვევის წინააღმდეგ ეფექტიანი ბრძოლისთვის საჭირო და ძალზე მნიშვნელოვანია მოქალაქეთა აქტიური ჩართულობა. დაუყოვნებლივ უნდა შეწყდეს საზოგადოების გარკვეული წრეების მხრიდან ე.წ. მსუბუქი ნარკოტიკების მოხმარების სხვადასხვა ფორმით წახალისება, ნარკოპოლიტიკის ლიბერალიზაციის თემით სპეკულირება, რადგან ჯანმრთელობას ყველა სახის ნარკოტიკი ზიანს აყენებს. ერთი შეხედვით „უვნებელი“ ე.წ. კლუბური ნარკოტიკები და მათი უკონტროლო მიღება ახალგაზრდების სიცოცხლეს და ჯანმრთელობას სერიოზულ საფრთხეს უქმნის. არსებულ ვითარებაში კლუბური ნარკოტიკების, რომლებიც სინამდვილეში ნარკოტიკული საშუალებებია წინააღმდეგ ბრძოლა ახალგაზრდა თაობის გადასარჩენად ბრძოლაა.