“ოთხოზორია-ტატუნაშვილის სიის” მიღებით საქართველოს ხელისუფლება აგრძელებს აქტიურ ძალისხმევას, რაც საერთაშორისო თანამეგობრობის ჩართულობით, ჩვენი მოქალაქეების მიმართ ჩადენილ მძიმე დანაშაულებზე სამართლის აღსრულებას ემსახურება.
საქართველოს პარლამენტში 2018 წლის 21 მარტს მიღებული რეზოლუციის თანახმად, საქართველოს მთავრობამ მოამზადა დადგენილების პროექტი, რომლის შესაბამისად განისაზღვრა ოთხოზორია-ტატუნაშვილის სია.
აღნიშნულ სიაში, რეზოლუციის შესაბამისად, შეყვანილი არიან ოკუპირებულ ტერიტორიებზე საქართველოს მოქალაქეების წინააღმდეგ ჩადენილ დანაშაულებში (მკვლელობა, გატაცება, წამება და არაჰუმანური მოპყრობა, ჯანმრთელობის მძიმე დაზიანება და ამ დანაშაულთა დაფარვა) ბრალდებული და მსჯავრდებული პირები.
სიაში ამ ეტაპზე 33 ადამიანია, რომლებმაც 1991 წლიდან დღემდე, ოკუპირებულ ტერიტორიებზე, საქართველოს მოქალაქეების მიმართ სხვადასხვა დანაშაული ჩაიდინეს.
აღსანიშნავია, რომ ბრალდებულ და მსჯავრდებულ პირთა სია დახურული არ არის რადგანაც, სამართალდამცავი უწყებები აგრძელებენ საგამოძიებო მოქმედებებს და აღნიშნული სია, შესაძლოა, მომავალში კიდევ უფრო გაფართოვდეს.
მთავრობის დადგენილებით, განისაზღვრა ყველა ის ღონისძიება, რომელიც ამ სიაში შემავალი პირების მიმართ საერთაშორისო ორგანიზაციებისა და საქართველოს პარტნიორი ქვეყნების მიერ ყველა შესაძლო შეზღუდვის დასაწესებლად და სამართლის აღსრულების ხელშესაწყობად უნდა გატარდეს.
ასევე განისაზღვრა დადგენილების აღსრულებაზე შესაბამისი პასუხისმგებელი სახელმწიფო უწყებები, რომლებიც პერიოდულად წარუდგენენ ანგარიშს პარლამენტს და მთავრობას დადგენილების აღსრულების თაობაზე.
საქართველოს ხელისუფლება აქტიურად მუშაობს იმისთვის, რათა „ოთხოზორია-ტატუნაშვილის“ სიის ჰქონდეს საერთაშორისო თანამეგობრობის მხარდაჭერა და მის ამოქმედებას რეალური შედეგები მოჰყვეს!
საქართველოს ხელისუფლება, საერთაშორისო პარტნიორების ჩართულობით, ყველაფერს აკეთებს და გააკეთებს, რომ არჩილ ტატუნაშვილის საქმის საფუძვლიანი გამოძიების შესაძლებლობა გვქონდეს და უზრუნველყოფილ იქნას დამნაშავეთა მიმართ სამართლის აღსრულება, როგორც არჩილ ტატუნაშვილის, ასევე გიგა ოთხოზორიას მკვლელის/მკვლელების მიმართ.