მესიჯები:

 

·       ზუსტად ოთხი წლის წინ, 2014 წლის 27 ივნისს, ევროკავშირთან ხელი მოეწერა  „ასოცირების შესახებ შეთანხმებას“,  ღრმა და ყოვლისმომცველი თავისუფალი სავაჭრო სივრცის კომპონენტის ჩათვლით.  ამ ხელმოწერამ, თვისობრივად სრულიად ახალ ეტაპზე გადაიყვანა ევროკავშირთან ჩვენი ურთიერთობები და დასაბამი დაუდო ევროკავშირთან ჩვენი პოლიტიკური ასოცირებისა და ეკონომიკური ინტეგრაციის პროცესს.

 

·       ასოცირების შეთანხმება, პრაქტიკულად, საქართველოს მოდერნიზაციის სამოქმედო გეგმაა, რომელიც ქვეყნის პოლიტიკური, სოციალური და ეკონომიკური ცხოვრების ყველა სფეროს ეხება და ის სრულ თანხვედრაშია საქართველოს მთავრობის რეფორმების გეგმებთან და ქვეყნის სოციალურ-ეკონომიკური განვითარების ხედვასთან. ასოცირების შეთანხმების ხელმოწერის შემდეგ, საქართველოს მთავრობის დიდი ძალისხმევის შედეგად ჩვენ მივაღწიეთ არაერთ ხელშესახები წარმატებას და შედეგს:

 

-        ძალაში შევიდა ევროკავშირის/შენგენის ზონაში უვიზო მიმოსვლა და 2017 წლის 28 მარტიდან დღემდე 300 000-ზე მეტმა ჩვენმა თანამოქალაქემ ისარგებლა ამ სიკეთით, რაც ძალიან მნიშვნელოვანი მონაპოვარი გახლავთ.

-       ევროკავშირთან დავიწყეთ მაღალი დონის სტრატეგიული დიალოგი უსაფრთხოების საკითხებზე, სადაც განვიხილავთ უსაფრთხოებისა და თავდაცვის სფეროში არსებულ საერთო გამოწვევებს. 

-       ასოცირების შეთანხმების ხელმოწერიდან დღემდე, საქართველომ 400 მლნ. ევრომდე ევროკავშირის ფინანსური დახმარება მიიღო;

-       საქართველო შეუერთდა ენერგეტიკულ გაერთიანებას, რაც კიდევ უფრო გაამყარებს ქვეყნის ენერგოუსაფრთხოებას 

-       საქართველომ დაიწყო აქტიური თანამშრომლობს ევროკავშირის სააგენტოებთან (EUROPOL,  EUROJUST და სხვა) და მონაწილეობს ევროკავშირის პროგრამებში,  როგორებიცაა „შემოქმედებითი ევროპა“, „ჰორიზონტი 2020“, ERASMUS+ და სხვა.

-       განხორციელდა მნიშვნელოვანი რეფორმები  ადამიანის უფლებების დაცვის, დემოკრატიული ინსტიტუტების განვითარების, კანონის უზენაესობის, კორუფციასთან და ორგანიზებულ დანაშაულთან ბრძოლის, ენერგეტიკის და სხვა მრავალი მიმართულებით.

 

 

·       ყოველივე ამის შედეგად  დღეს, ასოცირების შეთანხმების ხელმოწერიდან 4 წლის თავზე, საქართველო ისე ახლოსაა  ევროკავშირთან, როგორც არასოდეს.

 

·       საქართველო-ევროკავშირის ურთიერთობებში უკვე მიღწეული პროგრესის მიუხედავად, მნიშვნელოვანია ევროკავშირთან საქართველოს უფრო მჭიდრო ინტეგრაცია, ვიდრე ეს გათვალისწინებულია  ასოცირების შეთანხმებით. სწორედ ამ მიზანს ემსახურება საქართველოს ევროკავშირში ინტეგრაციის საგზაო რუკის შემუშავება, რომლის  განხორციელება კიდევ უფრო მეტ დინამიზმს შესძენს საქართველო-ევროკავშირის ურთიერთობებს.

 

·       ასევე ჩვენ ვიწყებთ სრულიად ახალ ფორმატს, რომელიც თანმიმდევრულად ხელს შეუწყობს საქართველოს სექტორულ ინტეგრაციას ევროკავშირთან. ეს იქნება უმაღლესი დონის ფორმატი, რომლის ფარგლებშიც შეხვედრები, საქართველოს პრემიერ-მინისტრისა და ევროკომისიის პრეზიდენტის ხელმძღვანელობით განხორციელდება და ზედამხედველობას გაუწევს საერთო პრიორიტეტის მქონე დარგებში თანამშრომლობის ინტენსიფიკაციას.