გიგზავნით შინაგან საქმეთა სამინისტროს მიერ მომზადებულ ინფორმაციას ბოლო პერიოდში გახსნილი და აღკვეთილი დანაშაულების შესახებ (გახსნილია ყაჩაღობის არაერთი ფაქტი, ამოღებულია დიდი რაოდენობით იარაღი და ოჯახში ძალადობის ბრალდებით დაკავებულია 14  ადამიანი)

ზოგადი ინფორმაციისთვის:

·   შინაგან საქმეთა სამინისტრომ დაიწყო რეფორმირების პროცესი, რომელიც მიზნად ისახავს პოლიცია დაეფუძნოს ტექნოლოგიებს, ანალიზსა და პრევენციას. რეფორმირება დაწყებულია კრიმინალურ პოლიციაში, სასაზღვრო პოლიციასა და  საპატრულო პოლიციაში. მიმდინარეობს გამოძიების მექანიზმების გაუმჯობესება, ტექნიკური აღჭურვა და რესურსების ოპტიმიზაცია.

·   შინაგან საქმეთა სამინისტრო სამართლიანი, პოლიტიკურად ნეიტრალური და გამჭვირვალე საპოლიციო სისტემაა. ახლა მნიშვნელოვანია ამაღლდეს საზოგადოების თანამშრომლობის სურვილი და სამოქალაქო პასუხისმგებლობის განცდა. 

·   პოლიცია ყოველდღიურად  დაუღალავად ებრძვის კრიმინალს, დანაშაულს და ქურდულ მენტალიტეტს. საზოგადოებას მოვუწოდებთ, აქტიურად ჩაერთოს ამ პროცესში. ასევე მნიშვნელოვანია პატივი ვცეთ პოლიციელის შრომას და ავამაღლოთ მათი მოტივაცია, რადგან ხელშეწყობის გარეშე, ვერ მივიღებთ სასურველ შედეგს. 

·   სამინისტრო აქტიურად თანამშრომლობს სახელმწიფო უწყებებთან. საერთაშორისო პარტნიორებთან და არასამთავრობო ორგანიზაციებთან, რათა ერთობლივი მუშაობის შედეგად მოვახდინოთ ეფექტიანი რეფორმირება.

·   რეფორმების პროცესი დაიწყო ადამიანის უფლებათა დაცვის დეპარტამენტის შექმნით და ეს შემთხვევითი არ არის. ჩვენი მიზანია, სწორედ  ადამიანის უფლებების დაცვით ვებრძოლოთ კრიმინალს. ახალი დეპარტამენტის მთავარი მიმართულებაა ოჯახში, ქალთა მიმართ, დისკრიმინაციულ, სიძულვილით ჩადენილი და არასრულწლოვნების მიმართ, ან მათ მიერ ჩადენილი დანაშაულების გამოძიების ეფექტიანობის გაზრდა.

დღევანდელი ბრიფინგი: 

დღეს ჩატარებულ ბრიფინგზე სამინისტრომ გაავრცელა ინფორმაცია ბოლო პერიოდში ყაჩაღობის არაერთი ფაქტის გახსნის, დანაშაულების, უკანონო ცეცხლსასროლი იარაღის ამოღების და ოჯახში ძალადობის ფაქტების აღკვეთის შესახებ, რაც ემსახურება საზოგადობის ინფორმირებასა და დანაშაულის პრევენციას.