საბჭოს პატივცემულო  წევრებო,

გიზიარებთ ინფორმაციას აშშ-ში, ემორის უნივერსიტეტში გამართული შეხვედრების თაობაზე.

ემორი-საქართველოს პროექტის ფარგლებში ამერიკული მხარის მიწვევით თანამშრომლობის მიმდინარე სტატუსის შეფასებისა და მომავალი გეგმების დასახვის მიზნით შედგა ოფიციალური  ვიზიტი.

შეხვედრების უშუალო ორგანიზატორი იყო ემორის უნივერსიტეტის საზოგადოებრივი ჯანდაცვის სკოლის ეპიდემიოლოგიის და გლობალური ჯანმრთელობის მიმართულების პროფესორი და ემორის უნივერსიტეტის და ატლანტის კლინიკური და გამოყენებითი მეცნიერების ინსტიტუტში სასწავლო პროგრამის დირექტორი, პროფესორი ჰენრი ბლუმბერგი.

შეხვედრები შედგა:

o   პროფესორ ჰენრი ბლუმბერგთან;

o   რასელ კემპკერთან, ასისტენტ პროფესორი, ემორის უნივერსიტეტის სამედიცინო სკოლის ინფექციური სნეულებების განყოფილება

o   პროფესორ ჯონ უარდთან, ამერიკის დაავადებათა კონტროლის ცენტრის (ადკც) ვირუსული ჰეპატიტების პროგრამის დირექტორი;

o   ეკატერინა კურბატოვასთან, ადკც-ს საერთაშორისო კვლევებისა და პროგრამების უფროსი სპეციალისტი;

o   პროფესორ დებორა მაკფარლანდთან, ჯანდაცვის პოლიტიკის და მართვის დეპარტამენტის ასოცირებული პროფესორი ემორის უნივერსიტეტში;

o   პროფესორ კენეტ კასტროსთან, ემორის უნივერსიტეტის ჯანდაცვის სკოლის გლობალური ჯანმრთელობის პროფესორი და ფოგარტის პროგრამის სამეთვალყურეო საბჭოს წევრი;

o   პროფესორ ტომას ზიგლერთან, ემორის უნივერსიტეტის ენდოკრინოლოგიის, მეტაბოლიზმის და ლიპიდების განყოფილების პროფესორი და ასევე ემორის კლინიკური და მოლეკულური ნუტრიციოლოგიის ცენტრის დირექტორი;

o   მეთიუ მეგისთან, ჯორჯიის სახელმწიფო უნივერსიტეტის ეპიდემიოლოგიისა და ბიოსტატისტიკის დეპარტამენტის  პროფესორი;

o   პროფესორ ვეტკან ნარაიანთან, ადკც არაგადამდებ დაავადებათა დეპარტამენტის უფროსი;

o   რეზიდენტებთან - ალფონსო ერნანდესთან და ჯონათან სალუდთან, რომლებიც ა.წ. მარტში მივლინებული იქნებიან ტუბერკულოზის ეროვნულ ცენტრში ერთთვიანი სარეზიდენტო მოდულის გასავლელად.

ყველა შეხვედრაზე ხაზი გაესვა საქართველოს ჯანმრთელობის, შრომის და სოციალური დაცვის მინისტრის და სამინისტროს აპარატის, პარლამენტის,  დაავადებათა კონტროლის ეროვნული ცენტრის უშუალო ჩართულობას და მტკიცე ხელშეწყობას ქვეყანაში ჯანდაცვის პროგრამების, მათ შორის, განსაკუთრებით, ინფექციურ დაავადებათა (C ჰეპატიტი, შიდსი, ტუბერკულოზი) მართვის პროგრამების ეფექტურად განხორციელების მიმართულებით.

შეხვედრების მსვლელობაში მიღწეულ იქნა შემდეგი სახის შეთანხმებები:

ü  განიხილება ტუბერკულოზის ეროვნული ცენტრის ამერიკის დაავადებათა კონტროლის ცენტრის კვლევითი პროექტების კონსორციუმის წევრად მიღების საკითხი, რაც საშუალებას მისცემს ქართველ მკვლევარებს ჩაერთონ მნიშვნელოვან კვლევით პროექტებსა და პროგრამებში. ამ მიმართულებით მხარეები იმუშავებენ შესაბამისი ოფიციალური განაცხადის მომზადებაზე;

ü  მომზადდება ფოგარტის სატრეინინგო ხუთწლიანი მომავალი ერთობლივი პროგრამის განაცხადი;

ü  ტუბერკულოზისა და C ჰეპატიტის კოინფექციის ერთობლივი მართვის პერსპექტივები;

ü  რამდენიმე ერთობლივი კვლევითი პროექტის დაწყება, მათ შორის, ტუბერკულოზით დაავადებულთა ნუტრიციოლოგიური პროფილის განსაზღვრა, ტუბერკულოზისა და დიაბეტის მართვის თავისებურებები  ახალი მედიკამენტებით მკურნალობის პირობებში და სხვა (ამერიკის ჯანდაცვის ეროვნული ინსტიტუტის საგრანტო პროგრამების ხელშეწყობით);

ü  ა.წ. სექტემბერში ემორის უნივერსიტეტის საზოგადოებრივი ჯანდაცვის სკოლის, საქართველოს დაავადებათა კონტროლის ეროვნული ცენტრის და ტუბერკულოზისა და ფილტვის დაავადებათა ეროვნული ცენტრის  თანაორგანიზატორობით ტუბერკულოზის მართვის აქტუალურ საკითხებზე თბილისის საერთაშორისო კონფერენციის ჩატარება (გლობალური ფონდის დაფინანსებით);

ü  ფოგარტის მიმდინარე პროექტის ფარგლებში ახალ კანდიდატთა შერჩევის საკითხი;

ü  პოსტდოქტორული სწავლების ერთწლიანი გაცვლითი პროგრამის დაწყება (ა.წ. ნოემბრიდან განაცხადების მიღება);

ü  ემორი-ტუბერკულოზის ეროვნული ცენტრის ერთობლივი საბჭოს შექმნა კოლაბორაციული სადოქტორო პროგრამების შემუშავების მიზნით.

 ამერიკელმა პარტნიორებმა მოიწონეს ერთობლივი საქმიანობით მიღწეული შედეგები,  ხაზი განსაკუთრებით გაესვა ფოგარტის პროგრამის ქართველ კურსდამთავრებულთა ჩართულობას ტუბერკულოზის პროგრამის განხორციელებაში და მათ მიერ მიღწეულ პრაქტიკულ შედეგებს (ფარმაკოუსაფრთხოების სისტემის შექმნა, ახალი მედიკამენტებით მკურნალობის მოდელების და შესაბამისი გაიდლაინების შემუშავება და დანერგვა, ახალი კვლევითი პროექტების ინიცირება და სხვა). აღინიშნა ისიც, რომ მიღწეული პროგრესის შენარჩუნება და განვითარება პრიორიტეტული ამოცანაა ორივე მხარისათვის. 

პატივისცემით,

ზაზა ავალიანი

Zaza Avaliani, MD PhD Professor

Director, National Center for Tuberculosis and Lung Diseases

8, Achara str. Tbilisi, 0101 Georgia

Phone (office): (+995 32) 2910252

Phone (cell): (+995 599) 585336