1.         დღეს, ჩვენი ეკონომიკის ერთ-ერთი უმთავრესი გამოწვევაა, განსაკუთრებით, საშუალო და მცირე ბიზნესისთვის სასტარტო კაპიტალზე წვდომის არარსებობა. სწორედ, ხელმისაწვდომ ფინანსურ რესურსებზე წვდომის არარსებობის გამო, ბიზნეს დღეს არ აქვს შესაძლებლობა განვითარდეს, მოხდეს სტარტაპების განვითარება, რაც შექმნიდა ახალ სამუშაო ადგილებს ჩვენს ქვეყანაში, კიდევ უფრო მეტად დაჩქარდებოდა ეკონომიკური ზრდა;

2.         დღეს, ჩვენს ქვეყანაში შექმნილია ვითარება, როდესაც საბანკო სისტემა არათუ ხელს უწყობს თავისუფალ, საბაზრო პირობებში ეკონომიკის განვითარებას, არამედ, პირიქით, სერიოზულად ამუხრუჭებს ეკონომიკას. დღეს, თითოეულმა ჩვენმა მოქალაქემ, განსაკუთრებით საშუალო ან მცირე მეწარმემ, ძალიან კარგად იცის, რომ ბანკები მუშაობენ ზემოგებებზე, მაშინ, როდესაც ჩვენი მოქალაქეებისთვის ხელმიუწვდომელია იაფი ფინანსური რესურსი;

3.         ჩვენი ქვეყნის დადებითი პოზიციონირება როგორც ჩვენს რეგიონში, ისე მსოფლიოში, წამყვანი ადგილები სხვადასხვა საერთაშორისო რეიტინგებში, საბანკო სექტორს გზას უხსნის იაფ ფულად რესურსებზე დონორების მხრიდან. ამის მიუხედავად, ეს ფაქტორი პრაქტიკულად არ აისახება საპროცენტო განაკვეთებზე. დღეს ბანკების საპროცენტო განაკვეთები არაადეკვატურად მაღალია.

4.         ჩვენ უკვე დიდი ხანია ვსაუბრობთ იმაზე, რომ საბანკო სექტორი მონოპოლიზირებულია და უკვე სერიოზულ კონკურენციას უწევს ბიზნესს და აღარ აძლევს მას განვითარების საშუალებას.

5.         ამ ვითარების შეცვლისთვის იქმნება ალტერნატიული წყარო, რაც დღეს გააჟღერა ფინანსთა მინისტრმა და ეს ინიციატივა გულისხმობს სასტარტო კაპიტალის რეფორმას. ამ რეფორმის ფარგლებში დამწყებ ბიზნესს ექნება წვდომა იაფ, ფულად რესურსთან, რომელიც იქნება მაღალპროცენტიანი საბანკო პროდუქტების რეალური ალტერნატივა.

6.         ფინანსთა სამინისტროს მხრიდან ბოლო პერიოდში დაანონსებულ უმნიშვნელოვანეს რეფორმებთან ერთად  სასტარტო კაპიტალის რეფორმა უზრუნველყოფს იმას, რომ მნიშვნელოვნად გაიზრდება სამეწარმეო აქტივობა ჩვენს ქვეყანაში.

7.         აღნიშნული რეფორმები ხელს შეუწყობს ბიზნესის განვითარებას ქვეყანაში, შეიქმნება მეტი სამუშაო ადგილი, გაიზრდება ეკონომიკური აქტივობები, შემცირდება ინტელექტუალური კაპიტალის გადინება ქვეყნიდან, რადგან პერსპექტიულ ახალგაზრდებს ექნებათ რეალური შესაძლებლობა იაფ ფინანსურ რესურსზე ხელმისაწვდომობით, განახორციელონ ახალი ინიციატივები, დაიწყონ ბიზნესი და ხელი შეუწყონ ქვეყნის ეკონომიკის განვითარებას.