სოციალური პარტნიორობის სამმხრივი კომისიის ფარგლებში სამუშაო ჯგუფის შექმნის შესახებ

 

,,სოციალური პარტნიორობის სამმხრივი დებულების დამტკიცების შესახებ“ საქართველოს მთავრობის 2013 წლის 7 ოქტომბრის N258 დადგენილებით დამტკიცებული  დებულების მე-7 მუხლის, ,,საქართველოს შრომის, ჯანმრთელობისა და სოციალური დაცვის სამინისტროს დებულების დამტკიცების შესახებ“ საქართველოს მთავრობის 2005 წლის 31 დეკემბრის №249 დადგენილებით დამტკიცებული დებულების მე-5 მუხლის მე-2 პუნქტის „ა და ,,ნ“ ქვეპუნქტებისა და მე-19 მუხლის პირველი პუნქტის, საქართველოს ზოგადი ადმინისტრაციული კოდექსის 61-ე მუხლისა და ,,სოციალური პარტნიორობის სამმხრივი კომისიის სხდომის ოქმის“ 2016 წლის 11 აპრილის N1 სხდომის ოქმის IV ნაწილის მე-2 პუნქტით გათვალისწინებული დავალების შესაბამისად,   

ვ ბ რ ძ ა ნ ე ბ:

1. სოციალური პარტნიორობის სამმხრივი კომისიის ფარგლებში შეიქმნას სამუშაო ჯგუფი (შემდგომში - სამუშაო ჯგუფი)  შემდეგი შემადგენლობით:

ა) ელზა ჯგერენაია - საქართველოს შრომის, ჯანმრთელობისა და სოციალური დაცვის სამინისტროს შრომისა და დასაქმების პოლიტიკის დეპარტამენტის უფროსი,  სამუშაო ჯგუფის ხელმძღვანელი;

ბ) თორნიკე დვალი - საქართველოს მთავრობის ადმინისტრაციის ადამიანის უფლებათა დაცვის სამდივნოს მრჩეველი, სამუშაო ჯგუფის წევრი;

გ) ირინა კვაჭანტირაძე - საქართველოს იუსტიციის სამინისტროს სამართალშემოქმედების დეპარტამენტის საჯარო და სისხლის სამართლის სამმართველოს მრჩეველი, სამუშაო ჯგუფის წევრი;

დ) ოთარ კონჯარია - საქართველოს რეგიონული განვითარებისა და ინფრასტრუქტურის სამინისტროს თვითმმართველობის განვითარებისა და რეგიონული პოლიტიკის დეპარტამენტის უფროსის მოადგილე, სამუშაო ჯგუფის წევრი;

ე) თამარ სამხარაძე - საქართველოს განათლებისა და მეცნიერების სამინისტროს პროფესიული განათლების განვითარების დეპარტამენტის პოლიტიკის სამმართველოს უფროსი, სამუშაო ჯგუფის წევრი;

ვ) თეა სონიშვილი - საქართველოს ეკონომიკისა და მდგრადი განვითარების სამინისტროს რეგულირების გავლენისა და კონკურენტუნარიანობის კვლევის სამმართველოს მთავარი სპეციალისტი, სამუშაო ჯგუფის წევრი;

ზ) ეთერ მათურელი - საქართველოს პროფესიული კავშირების გაერთიანების თავმჯდომარის მოადგილე, სამუშაო ჯგუფის წევრი;

თ) ირაკლი ამირანაშვილი - საქართველოს მედიცინის, ფარმაციისა და სოციალური დაცვის მუშაკთა პროფესიული კავშირის თავმჯდომარე, სამუშაო ჯგუფის წევრი;

ი) რაისა ლიპარტელიანი - საქართველოს პროფესიული კავშირების გაერთიანების იურიდიული დეპარტამენტის ხელმძღვანელი, სამუშაო ჯგუფის წევრი;

კ)  თამარ სურმავა - საქართველოს პროფესიული კავშირების გაერთიანების იურისტი, სამუშაო ჯგუფის წევრი;

ლ)  ნიკა კაკაშვილი - საქართველოს პროფესიული კავშირების გაერთიანების შრომის დაცვის მთავარი ტექნიკური ინსპექტორი, სამუშაო ჯგუფის წევრი;

მ) გიორგი ჭანტურიძე - საქართველოს პროფესიული კავშირების გაერთიანების ეკონომისტი, სამუშაო ჯგუფის წევრი;

ნ)  მიხეილ  კორძახია -  საქართველოს დამსაქმებელთა ასოციაციის ვიცე-პრეზიდენტი, სამუშაო ჯგუფის წევრი;

ო) ლაშა ლაბაძე - საქართველოს დამსაქმებელთა ასოციაციის აღმასრულებელი დირექტორი, სამუშაო ჯგუფის წევრი;

პ) მიხეილ ჭელიძე -  საქართველოს მცირე და საშუალო მეწარმეთა ასოციაციის პრეზიდენტი, სამუშაო ჯგუფის წევრი;

ჟ) ნიკოლოზ ნანუაშვილი - საქართველოს ბიზნეს ასოციაციის ანალიტიკური მიმართულების მენეჯერი, სამუშაო ჯგუფის წევრი;

რ)   ნათია ქუტიძე -  ქალდამსაქმებელთა ასოციაციის გამგეობის წევრი, სამუშაო ჯგუფის წევრი;

ს) ლევან სილაგავა - საქართველოს მწარმოებელთა ფედერაციის გამგეობის თავმჯდომარე, სამუშაო ჯგუფის წევრი.

2. სამუშაო ჯგუფის მიზანია 2016-2017 წლების სტრატეგიული გეგმით გათვალისწინებული საკითხების განხილვა და სოციალური პარტნიორობის სამმხრივი კომისიისთვის შესაბამისი წინადადებებისა და პროექტების მომზადება და წარდგენა.

3. სამუშაო ჯგუფის წევრები საქმიანობისას იცავენ შემდეგ პრინციპებს:

ა) სამუშაო ჯგუფის წევრების თანასწორობა და დამოუკიდებლობა;

ბ) სამუშაო ჯგუფის წევრების ინტერესების პატივისცემა;

გ) კოორდინაცია და პასუხისმგებლობა;

დ) ინფორმირებულობა;

ე) დაკისრებულ ვალდებულებათა შესრულება;

ვ) კონსენსუსი.

4.  სამუშაო ჯგუფი  იკრიბება  თვეში ერთხელ.

5. სამუშაო ჯგუფის ხელმძღვანელი უძღვება სამუშაო ჯგუფის სხდომებს, აცნობს ჯგუფის წევრებს დღის წესრიგს, სამუშაო ჯგუფის წევრებთან ათანხმებს მომდევნო სხდომაზე განსახილველ საკითხებსა და სამუშაო ჯგუფის მომდევნო შეხვედრის  თარიღს, ხელს აწერს სხდომის ოქმებს.

6. სამუშაო ჯგუფის ხელმძღვანელის არყოფნის შემთხვევაში, სამუშაო ჯგუფის ხელმძღვანელის დავალებით სამუშაო ჯგუფის სხდომას უძღვება შრომისა და დასაქმების პოლიტიკის დეპარტამენტის წარმომადგენელი.

7. სამუშაო ჯგუფის სამდივნოს ფუნქციებს  (შეხვედრების ორგანიზება, ოქმების წარმოება, ექსპერტებისა და სპეციალისტების მოწვევა, სხდომის მასალებით უზრუნველყოფა და სხვა ორგანიზაციული საკითხების გადაწყვეტა) ასრულებს სამინისტროს შრომისა და დასაქმების პოლიტიკის დეპარტამენტი.

8. სამუშაო ჯგუფი გადაწყვეტილებას იღებს ღია კენჭისყრით, ხმათა უბრალო უმრავლესობით.

9. სამუშაო ჯგუფის წევრს უფლება აქვს კენჭისყრის დროს დაეთანხმოს კენჭისყრაზე დაყენებულ საკითხს, თავი შეიკავოს ან დააფიქსიროს განსხვავებული მოსაზრება, რომელიც წერილობითი სახით დაერთვის სამუშაო ჯგუფის შეხვედრის ოქმს.

10. სამუშაო ჯგუფი უფლებამოსილია ცალკეული საკითხების დამუშავების პროცესში მოიწვიოს შესაბამისი სფეროს  ექსპერტები, სპეციალისტები და სხვა დაინტერესებული პირები.

11. ძალადაკარგულად გამოცხადდეს ,,სოციალური პარტნიორობის სამმხრივი კომისიის ფარგლებში სამუშაო ჯგუფის შექმნის შესახებ“ საქართველოს შრომის, ჯანმრთელობისა და სოციალური დაცვის მინისტრის 2014 წლის 17 მაისის N01-114 ბრძანება.

12.  ბრძანება ძალაშია ხელმოწერისთანავე.