მოგესალმებით,  

როგორც მოგეხსენებათ, საქართველოს პრემიერ-მინისტრის, ბატონი მამუკა ბახტაძის გადაწყვეტილებით, 2019 წლის თებერვლიდან „ღია მმართველობის პარტნიორობაში“ (Open Government Partnership - OGP) საქართველოს მონაწილეობას ეროვნულ და საერთაშორისო დონეზე კოორდინაციას საქართველოს მთავრობის ადმინისტრაცია უწევს.

OGP საქართველოს სამდივნოს ფუნქციას საქართველოს მთავრობის ადმინისტრაციის პოლიტიკის დაგეგმვისა და კოორდინაციის დეპარტამენტი შეასრულებს.

გაცნობებთ, რომ, ამ ეტაპზე, სამუშაო შეხვედრები მიმდინარეობს სამდივნოსა და ფორუმის წევრ სამოქალაქო საზოგადოების წარმომადგენლებს შორის. სრული შემადგენლობით ფორუმის მორიგი შეხვედრის შესახებ უახლოეს მომავალში შეგატყობინებთ.

ღია მმართველობა საქართველოს 2018-2019 წლების სამოქმედო გეგმის პასუხისმგებელ უწყებებს დამატებით გაცნობებთ, რომ მიმდინარე სამოქმედო გეგმის შეფასების დამოუკიდებელ მკვლევარად (Independent Reporting Mechanism – IRM) OGP-ის მიერ შერჩეულ იქნა ბატონი ნოდარ ხერხეულიძე (საკონტაქტო ელ. ფოსტა იხილეთ წინამდებარე წერილის ასლში). მიმდინარე გეგმასთან დაკავშირებით, OGP-ის წესების თანახმად, IRM ორ ანგარიშს გამოაქვეყნებს:

-         საწყისი ანგარიში (Design Report), რომელშიც ყურადღება გამახვილდება 2018-2019 წლების სამოქმედო გეგმის შემუშავების პროცესზე და გეგმის ვალდებულებათა შინაარსზე;

-         შესრულების ანგარიში, რომელიც ვალდებულებათა განხორციელებისას მიღწეულ შედეგებს შეაფასებს.

გაცნობებთ, რომ საქართველოს IRM მკვლევარი უკვე მუშაობს პირველად ანგარიშზე. დოკუმენტის მომზადების პროცესში მას პასუხისმგებელ უწყებებთან ინტერვიუების ჩატარება დასჭირდება. გთხოვთ, ამ მნიშვნელოვან პროცესში აქტიურად ითანამშრომლოთ ბატონ ნოდართან.

აქვე გაცნობებთ, რომ უახლოეს მომავალში, სამდივნოს წარმომადგენლები თქვენთან ერთად, საჭიროების მიხედვით, განვაახლებთ ღია მმართველობა საქართველოს ფორუმის წევრთა ჩამონათვალს და მათ საკონტაქტო ინფორმაციას.

ნებისმიერი კითხვის შემთხვევაში, გთხოვთ, დაუკავშირდეთ ნინა სარიშვილს, პოლიტიკის დაგეგმვისა და კოორდინაციის დეპარტამენტის უფროსს (nsarishvili@gov.ge; 599 85 00 50).

პატივისცემით,