გაცნობებთ, რომ საქართველოს შრომის, ჯანმრთელობისა და სოციალური დაცვის სამინისტროში შემოსული იყო მდინარე არაგვის აუზის ზედაპირული წყალამღებებისა და საინფილტრაციო სისტემების (ბოდორნის, ბულაჩაურის, ჭოპორტის, მისაქციელის, ნატახტარის, საგურამოს უბნები) სანიტარიული დაცვის ზონის ანგარიში, რომლის მიხედვით:

მდინარე არაგვის წყალი ბინძურდება სამეურნეო-ფეკალური ჩამდინარე წყლებით, რადგანაც მდინარე არაგვის აუზში განლაგებული დასახლებული პუნქტებიდან პრაქტიკულად არც ერთს არ აქვს საკანალიზაციო წყლების გამწმენდი ნაგებობა;

მდინარის მნიშვნელოვანი დაბინძურების წყაროა, ასევე, ჟინვალის წყალსაცავიდან ქვემო დინების მიმართულებით არსებული საკანალიზაციო კოლექტორი, რომელიც ახდენს დუშეთიდან და თბილისი-სტეფანწმინდის გზის გასწვრივ მდებარე დასახლებული პუნქტებიდან საკანალიზაციო წყლების ევაკუაციას ცენტრალიზებულ სისტემაში. პროექტით ირკვევა, რომ დღეისათვის სისტემა ნაწილობრივ ფუნქციონირებს და საჭიროებს რეაბილიტაციას;

მდინარე არაგვის აუზში არის ადგილები, სადაც ხორციელდება მყარი სამშენებლო ნარჩენებისა და ზედმეტი გრუნტის განთავსება. ნარჩენები სპონტანურად არის დაყრილი ბუნებრივ დეპრესიებში და მდინარე არაგვის შენაკადების კალაპოტებში, რაც კიდევ ერთ მნიშვნელოვან პრობლემას ქმნის მისი დაბინძურებისა და გამაჯანსაღებელი ღონისძიებების გატარების აუცილებლობის თვალსაზრისით;

მდინარე არაგვის დაბინძურების მნიშვნელოვანი წყაროა ქ. დუშეთის საკანალიზაციო სისტემა. ჩამდინარე წყლები იკრიბება ქალაქის აღმოსავლეთით, მდინარე დუშეთის ხევის მარცხენა მხარეს მოწყობილ მთავარ 400 მმ-იან კოლექტორში, რომლის საშუალებითაც ფეკალური წყლები ხვდება ხევის მარცხენა მხარეს.

არსებული მდგომარეობა ადგილზე შეისწავლა ა(ა)იპ მცხეთის მუნიციპალიტეტის საზოგადოებრივი ჯანმრთელობის ცენტრმა. მათ მიერ მოწოდებული ინფორმაციით, მდინარე არაგვის აუზში შექმნილია გარემოს დაბინძურების და ინფექციურ დაავადებების გავრცელების რეალური საფრთხე. განსაკუთრებით მძიმე მდგომარეობაა დუშეთის მუნიციპალიტეტში, სადაც იტბორება ხევის წყალი, ღიად მიედინება როგორც მოსახლეობის ფეკალური ჩამდინარე წყლები, ასევე, აქ მდებარე ხორცის დამამზადებელი სასაკლაოს ფუნქციონირების შედეგად დაბინძურებული ჩამდინარე წყლები, დგას მძაფრი სუნი და არის ანტისანიტარიული მდგომარეობა, რაც ქმნის ეპიდაფეთქების საშიშროებას.

ზემოაღნიშნულის გათვალისწინებით, შექმნილი მდგომარეობის გამოსწორების მიზნით, მართებულია, მომზადდეს მდინარე არაგვის აუზის სანიტარიული მდგომარეობის გაუმჯობესებისა და დაბინძურებისაგან დაცვის გეგმა, რომელშიც დეტალურად იქნება გაწერილი წყალმომარაგების წყაროების დამაბინძურებელი ობიექტებისგან დაცვის კონკრეტული ღონისძიებები (ადგილობრივი თვითმმართველობის ორგანოებთან შეთანხმებული), განხორციელების ვადებისა და პასუხისმგებელი უწყებების/ორგანოების მითითებით.

საქართველოს შრომის, ჯანმრთელობისა და სოციალური დაცვის სამინისტრო გამოთქვამს მზადყოფნას, კომპეტენციის ფარგლებში, მიიღოს მონაწილეობა ზემოაღნიშნული საკითხების გადაწყვეტისა და მოსახლეობის ჯანმრთელობისათვის უსაფრთხო გარემოს უზრუნველყოფის მიზნით დაგეგმილ სამუშაო შეხვედრებში.

პატივისცემით,

მინისტრის მოადგილე

მაია ლაგვილავა