ბატონო კახაბერ,

თქვენი 2017 წლის 21 აპრილის N01/1300 (N41483, 25.04.2017 წ.) წერილის პასუხად, სსიპ-სოციალური მომსახურების სააგენტო, კომპეტენციის ფარგლებში, გაცნობებთ:

„აბონენტების მიერ მაღალმთიან დასახლებაში მოხმარებული ელექტროენერგიის ყოველთვიური საფასურის ანაზღაურების შესახებ“ საქართველოს მთავრობის 2016 წლის 25 აგვისტოს N418 დადგენილების პირველი მუხლის თანახმად, 2017 წლის 1 იანვრიდან, სოციალური მომსახურების სააგენტოს აკისრია ვალდებულება, უზრუნველყოს „მაღალმთიანი რეგიონების განვითარების შესახებ“ საქართველოს კანონით განსაზღვრული აბონენტების მიერ ყოველთვიურად (30 კალენდარული დღე) მოხმარებული ელექტროენერგიის ღირებულების 50%-ის ოდენობით ანაზღაურება, ნორმაში მითითებული პირობებით,  რისთვისაც ამავე დადგენილების მე-4 მუხლის მიხედვით, შესაბამისი ელექტროენერგიის გამანაწილებელ ლიცენზიანტებს ეთხოვათ საქართველოს მთავრობის 2015 წლის 30 დეკემბრის N671 დადგენილებით დამტკიცებულ მაღალმთიან დასახლებებში არსებული აბონენტების (საყოფაცხოვრებო მომხმარებლების) შესახებ ინფორმაციის მიწოდება სსიპ-სოციალური მომსახურების სააგენტოსათვის.

სოციალური მომსახურების სააგენტოს მიერ ჩატარებული მოსამზადებელი სამუშაოების პროცესში წამოჭრილი პრობლემური საკითხების მიუხედავად, რაზედაც ასევე ეცნობა საქართველოს რეგიონული განვითარებისა და ინფრასტრუქტურის სამინისტროს (წერილი № 04/5602, 31.01.2017 წ.), ელექტროენერგიის გამანაწილებელ ლიცენზიანტთან (სს „ენერგო-პრო ჯორჯია“) გაფორმდა ხელშეკრულება  „ელექტროენერგიის ღირებულების სუბსიდირების შესახებ“.

სს „ენერგო-პრო ჯორჯია“-ს მიერ აპრილის თვეში გადმოგზავნილი 139 935 აბონენტიდან, 24 271 აბონენტს არ უფიქსირდებოდა პირადი ნომერი, 6 186 აბონენტზე მითითებული იყო არასწორი გვარი, ხოლო 51 300 აბონენტს არ გააჩნდა „მაღალმთიან დასახლებებში არსებული აბონენტების სტატუსი“. შესაბამისად, სააგენტომ განახორციელა 58 178 ბენეფიციარის იდენტიფიცირება, რომლებიც დაექვემდებარნენ სუბსიდირებას.

სააგენტომ, სს „ენერგო-პრო ჯორჯიას“ მიერ წარმოდგენილი აბონენტთა სიების დამუშავების საფუძველზე, განახორციელა 2017 წლის იანვრის, თებერვლის, მარტის, აპრილის თვეში ბენეფიციართა იდენტიფიცირება, ხოლო ლიცენზიანტმა შესაბამისი აბონენტების მიმართ განახორციელა სუბსიდირება.

დღეის მდგომარეობით, 2017 წლის იანვრის და თებერვლის  სუბსიდირება  სააგენტოს მხრიდან ანაზღაურებულია, ხოლო მარტის სუბსიდია ანაზღაურების პროცესშია.

ამავე საგანზე სს „კახეთის ენერგოდისტრიბუციასთან“ მიმდინარეობს ხელშეკრულების ხელმოწერის პროცედურები.

სს „კახეთის ენერგოდისტრიბუციამ“ აპრილის თვეში წარმოადგინა 316 აბონენტის შესახებ ინფორმაცია, რომელთაგან 9 აბონენტს დაუფიქსირდა არასწორი გვარი, 181 აბონენტს არ აღმოაჩნდა „მაღალმთიან დასახლებებში არსებული აბონენტების სტატუსი“.  შესაბამისად, 126 ბენეფიციარი ექვემდებარება სუბსიდირებას.

რაც შეეხება „მაღალმთიანი რეგიონების განვითარების შესახებ“ საქართველოს კანონის მე-4 მუხლის მე-2 პუნქტის „გ“ ქვეპუნქტით გათვალისწინებულ შეღავათს, გაცნობებთ, რომ აღნიშნული სცილდება სსიპ-სოციალური მომსახურების სააგენტოს კანონმდებლობით გათვალისწინებულ უფლება-მოვალეობების ფარგლებს.

პატივისცემით,

სსიპ – სოციალური მომსახურების სააგენტოს დირექტორი, საქართველოს შრომის, ჯანმრთელობისა და სოციალური დაცვის მინისტრის მოადგილე

ზაზა სოფრომაძე