| საქართველოს შრომის, |  | MINISTRY OF LABOUR, HEALTH | |
| ჯანმრთელობისა და სოციალური | AND SOCIAL AFFAIRS OF GEORGIA | ||
| დაცვის სამინისტრო | Legal Entity of Public Law | ||
| საჯარო სამართლის იურიდიული პირი | |||
| სოციალური მომსახურების | SOCIAL SERVICE | ||
| სააგენტო | AGENCY | ||
|
საქართველო, თბილისი 0159; აკ.წერეთლის გამზ. 144; ტელ.: (+995 32) 510 047; 510 048; 510 049
144 Ak.Tsereteli ave., 0159, Tbilisi, Georgia; Tel.: (+995 32) 510 047; 510 048; 510 049
| № 04/7580 | 01 / თებერვალი / 2016 წ. |
სტრუქტურულ და ტერიტორიულ ერთეულებს
გაცნობებთ, რომ შიდაკორპორაციულ ქსელში (ე.წ.შეარინგში) განთავსდება ყოველთვიურად განახლებადი მონაცემები „სოციალურად დაუცველი ოჯახების მონაცემთა ერთიან ბაზაში“ რეგისტრირებული ოჯახებისა და პირების შესახებ, რაიონების მიხედვით.
აღნიშნულ მონაცემებზე წვდომის უფლება განესაზღვრებათ, სააგენტოს ინფორმაციული ტექნოლოგიების დეპარტამენტთან შეთანხმებით, მხოლოდ სააგენტოს ტერიტორიული ერთეულების ხელმძღვანელების ბრძანებით სათანადოდ უფლებამოსილ პირებს, რომლებსაც დაეკისრებათ „სოციალურად დაუცველი ოჯახების მონაცემთა ერთიან ბაზაში“ დაცული ინფორმაციის კანონშესაბამისად გაცემაზე პასუხისმგებლობა.
ინფორმაცია ასახავს ყოველი თვის პირველი რიცხვის მდგომარეობას, რომლის განახლებაც მოხდება ყოველი თვის 5 რიცხვამდე.
აღნიშნული ბაზით შეგიძლიათ იხელმძღვანელოთ მხოლოდ სამსახურებრივი მიზნებისათვის.
ამასთან, ,,სოციალური დახმარების შესახებ“ საქართველოს კანონის მე-17 მუხლით, საქართველოს მთავრობის 2010 წლის 24 აპრილის N126 დადგენილებით დამტკიცებული ,,სოციალურად დაუცველი ოჯახების მონაცემთა ერთიანი ბაზის ფორმირების წესის“ მე-6 მუხლის პირველი პუნქტის „ე-ვ“ ქვეპუნქტებით, მე-7 და მე–8 მუხლების მე–3 პუნქტებით და ოჯახის დეკლარაციაზე ხელმოწერით გაცხადებული ოჯახის ინფორმირებული თანხმობით, გათვალისწინებულია „სოციალურად დაუცველი ოჯახების მონაცემთა ერთიან ბაზაში“ ასახული ინფორმაციის სხვა პირთათვის გაცემის პირობები, მათ შორის, მიზანი და გასაცემი ინფორმაციის მოცულობა.
გთხოვთ, გაითვალისწინოთ ზემოაღნიშნული ნორმები, „პერსონალურ მონაცემთა დაცვის შესახებ“ საქართველოს კანონის მე-4 და მე-5 მუხლების პირობები და სახელმწიფო ან ადგილობრივი თვითმმართველობის ორგანოების საჭიროებისამებრ, წერილობით დასაბუთებული მომართვის საფუძველზე, მიაწოდოთ მათ მიზნის ადეკვატური და პროპორციული მოცულობის შესაბამისი ინფორმაცია „სოციალურად დაუცველი ოჯახების მონაცემთა ერთიანი ბაზიდან“.
აქვე გთხოვთ, გაითვალისწინოთ, რომ არასამსახურებრივი მიზნით და კანონიერი საფუძვლების არარსებობის პირობებში, პერსონალური ინფორმაციის დამუშავება, მათ შორის, გამოყენება ან გამჟღავნება მონაცემთა გადაცემის, გავრცელების ან სხვაგვარად ხელმისაწვდომად გახდომის გზით, ითვალისწინებს ადმინისტრაციულ პასუხისმგებლობას.
გთხოვთ, უზრუნველყოთ დაქვემდებარებული თანამშრომლების ინფორმირება ზემოაღნიშნულის თაობაზე და არ დაუშვათ შესაბამის მონაცემებზე გარეშე პირთა წვდომა.
პატივისცემით,
