პერსონალურ მონაცემთა დაცვის ინსპექტორის მოადგილეს
ბატონ ნიკოლოზ ბრეგვაძეს

ბატონო ნიკოლოზ,

თქვენი 2016 წლის 14 ივნისის N PDP 5 16 00000172  წერილის პასუხად, რომელიც ეხება ჯანმრთელობის დაცვის სახელმწიფო პროგრამებში შვილად აყვანილი ბავშვის (პ/ნ 01553013930) ჩართვისას გამოყენებულ პირად მონაცემებს, სააგენტოს 2016 წლის 27 ივნისის N04/49114 შუალედური წერილის გათვალისწინებით და  წერილში დასმული კითხვების შესაბამისად, დამატებით გაცნობებთ:

მითითებული პირადი ნომრის მქონე ბავშვი ჩართულ იქნა საქართველოს მთავრობის 2011 წლის 15 თებერვლის №77 დადგენილებით დამტკიცებულ  „დედათა და ბავშვთა ჯანმრთელობის“ სახელმწიფო პროგრამის კომპონენტში - „ახალშობილთა და ბავშვთა სკრინინგი ჰიპოთირეოზზე, ფენილკეტონურიაზე, ჰიპერფენილალანინემიასა და მუკოვისციდოზზე“.  მისთვის ამ კომპონენტით გათვალისწინებული სამედიცინო მომსახურების მიწოდება განხორციელებული აქვს შპს „მედიკალ სოფტს“ (იურიდიული მისამართი: თბილისი, ჟ.შარტავას ქ.,N2ა).

საქართველოს შრომის, ჯანმრთელობისა და სოციალური დაცვის მინისტრის 2011 წლის 7 მარტის №01-1/ნ ბრძანებით დამტკიცებული „2011 წლის ჯანმრთელობის დაცვის სახელმწიფო პროგრამების ადმინისტრირების წესის და პირობების“ მე-20 მუხლის მე-8 პუნქტისა და მე-13 მუხლის თანახმად, ამ კომპონენტით სარგებლობისათვის არ იყო გათვალისწინებული  დაინტერესებული პირის წინასწარი მომართვა და თანხმობის წერილის/ვაუჩერის გაცემა. შესაბამისად, ბავშვის პროგრამაში ჩართვა განხორციელდა გეგმური მომსახურებისათვის დაინტერესებული პირის წინასწარი მომართვის, ე.ი. მატერიალიზებული ვაუჩერის/თანხმობის წერილის (ე.წ. საგარანტიო წერილი ან პოლისი) გაცემის გარეშე, მხოლოდ მიმწოდებელი სამედიცინო დაწესებულების მიერ წარმოდგენილი ინფორმაციის საფუძველზე.

სსიპ-სოციალური მომსახურების სააგენტოსთან გაფორმებული სახელმწიფო შესყიდვების ხელშეკრულების საფუძველზე, სამედიცინო მომსახურების მიმწოდებელი (ამ შემთხვევაში, შპს „მედიკალ სოფტი“) დამოუკიდებლად უზრუნველყოფდა პროგრამის მოსარგებლისათვის საქართველოს მთავრობის 2011 წლის 15 თებერვლის №77 დადგენილების N5.3 დანართით განსაზღვრული მოცულობის სამედიცინო მომსახურების მიწოდებას და აღნიშნულის თაობაზე პროგრამის განმახორციელებელთან ანგარიშგებას, პროგრამით განსაზღვრული პირობებით.

ამდენად, მითითებულ ბენეფიციარზე,  გაშვილებამდე პერიოდზე, სსიპ-სოციალური მომსახურების სააგენტოს მხრიდან თანხმობის/საგარანტიო წერილის გაცემა არ განხორციელებულა.

2012 წელს, იგივე პირადი ნომრით (შეცვლილი გვარით), ბავშვი ფიქსირდება „იმუნიზაციის“ სახელმწიფო პროგრამის „იმუნოპროფილაქტიკის წარმოების - აცრა-ვიზიტების“ კომპონენტის მოსარგებლედ, შპს „23-ე პოლიკლინიკა-საოჯახო მედიცინის ცენტრში“ (იურიდიული მისამართი: თბილისი, ვეკუას ქ., N18).

გაშვილებამდე პერიოდზე ჯანმრთელობის დაცვის სახელმწიფო პროგრამებით სარგებლობასთან დაკავშირებული სხვა ინფორმაცია ამ პირადი ნომრის მქონე პირზე, სსიპ-სოციალური მომსახურების სააგენტოში არ ფიქსირდება.

ზემოაღნიშნული ინფორმაცია ასევე გეგზავნებათ დანართის სახით.

პატივისცემით,