ქალბატონო თეა,

თქვენი 2017 წლის 6 აპრილის N35546 წერილის პასუხად, სსიპ-სოციალური მომსახურების სააგენტო, კომპეტენციის ფარგლებში, გაცნობებთ:

საქართველოს შრომის, ჯანმრთელობისა და სოციალური დაცვის მინისტრის 2007 წლის 27 ივნისის N190/ნ ბრძანებით დამტკიცებული დებულების და სხვა მარეგულირებელი ნორმატიული აქტების მიხედვით, სააგენტო არ წარმოადგენს იმ ადმინისტრაციულ ორგანოს, რომელიც ქვეყნის მასშტაბით, უზრუნველყოფს შეზღუდული შესაძლებლობის მქონე პირთა აღრიცხვას, მათ შორის, საცხოვრებელი ადგილის (რეგიონის/რაიონის, რეგისტრაციის/ფაქტობრივის) მიხედვით.

სსიპ - სოციალური მომსახურების სააგენტო, მინიჭებული უფლებამოსილების ფარგლებში, უზრუნველყოფს მხოლოდ კანონმდებლობით გათვალისწინებული გასაცემლის ადმინისტრირებას (სოციალური პაკეტი, სახელმწიფო პენსია, სახელმწიფო კომპენსაცია), რომლის დანიშვნის ერთ-ერთი საფუძველი შეიძლება იყოს შეზღუდული შესაძლებლობის სტატუსის დადგენა, კონკრეტული ბენეფიციარის მომართვის შესაბამისად.

ზემოაღნიშნულის გათვალისწინებით, 2017 წლის მარტის მდგომარეობით, დანართის სახით, გიგზავნით:

- რეგიონის/რაიონის მიხედვით, შეზღუდული შესაძლებლობის სტატუსის საფუძვლით სახელმწიფო გასაცემლების (სოციალური პაკეტი, სახელმწიფო კომპენსაცია) მიმღებ პირთა რაოდენობას ასაკობრივ ჭრილში;

- მაღალმთიან და დაბალმთიან დასახლებაში მუდმივად მცხოვრები იმ ოჯახების შესახებ სტატისტიკურ ინფორმაციას, რომელთა შემადგენლობაშიც ფიქსირდება 3 და მეტი (18 წლამდე) არასრულწლოვანი წევრი;

- „სოციალურად დაუცველი ოჯახების მონაცემთა ერთიან ბაზაში“ რეგისტრირებული ოჯახების/პირების რაოდენობებს, რეგიონის/რაიონის და სარეიტინგო ქულების მიხედვით;

ასევე გაცნობებთ, რომ საქართველოს შრომის, ჯანმრთელობისა და სოციალური დაცვის მინისტრის 2010 წლის 20 მაისის №141/ნ ბრძანებით დამტკიცებული „სოციალურად დაუცველი ოჯახების სოციალურ-ეკონომიკური მდგომარეობის შეფასების წესის“ მე-7 მუხლის მე-8 პუნქტის „ე“ ქვეპუნქტის შესაბამისად, 2017 წლის 6 აპრილის მდგომარეობით, „სოციალურად დაუცველი ოჯახების მონაცემთა ერთიან ბაზაში“ რეგისტრირებულია 4200 მარტოხელა დედა.

ნებისმიერი სხვა სახის სტატისტიკური ინფორმაცია (რეგიონების/რაიონების, წლების /თვეების მიხედვით), შეგიძლიათ იხილოთ სსიპ-სოციალური მომსახურების სააგენტოს ოფიციალურ ვებ-გვერდზე (www.ssa.gov.ge), შესაბამის ბმულზე -„სტატისტიკა“.

დანართი: 1 (ერთი) Excel -ის ფაილი

პატივისცემით,

დირექტორის მოადგილე

თენგიზ აბაზაძე