საქართველოს მთავრობის 2016 წლის 18 ივლისის N333 დადგენილებით დამტკიცებული „დასაქმების ხელშეწყობის მომსახურებათა განვითარების სახელმწიფო პროგრამის“, საქართველოს ზოგადი ადმინისტრაციული კოდექსის 53-ე მუხლის და საქართველოს შრომის, ჯანმრთელობის და სოციალური დაცვის მინისტრის 2007 წლის 27 ივნისის N190/ნ ბრძანებით დამტკიცებული სსიპ სოციალური მომსახურების სააგენტოს დებულების მე-4 მუხლის საფუძველზე:

ვ ბ რ ძ ა ნ ე ბ:

დამტკიცდეს:

ა) „დასაქმების ხელშეწყობის მომსახურებათა განვითარების სახელმწიფო პროგრამის“ სამუშაო ადგილების სუბსიდირების კომპონენტის მოსარგებლედ რეგისტრირების მსურველი პირის განაცხადის ფორმა (დანართი N1);

ბ) „დასაქმების ხელშეწყობის მომსახურებათა განვითარების სახელმწიფო პროგრამის“ სამუშაო ადგილების სუბსიდირების კომპონენტის მიმწოდებლად რეგისტრირების მსურველი პირის განაცხადის ფორმა (დანართი N2);

გ) ,,დასაქმების ხელშეწყობის მომსახურებათა განვითარების სახელმწიფო პროგრამის“ სამუშაო ადგილების სუბსიდირების კომპონენტით გათვალისწინებული მომსახურების მიწოდების შესახებ ხელშეკრულების ნიმუში (დანართი N3) და ამ ხელშეკრულებით გათვალისწინებული ფორმა (დანართი N1);

დ) „დასაქმების ხელშეწყობის მომსახურებათა განვითარების სახელმწიფო პროგრამის“ ვაუჩერი (დანართი N4);

ე) მომსახურების მიღების პირობებზე პროგრამის რეგისტრირებულ მოსარგებლესა და სააგენტოს შორის შეთანხმების ფორმა (დანართი N5);

2. ამ ბრძანების პირველი პუნქტით დამტკიცებული ხელშეკრულების ნიმუში არ წარმოადგენს სავალდებულო ხასიათის ფორმას და კონკრეტული სიტუაციის და/ან ხელმომწერი მხარის მოთხოვნით შესაძლებელია მასში ცვლილებ(ებ)ის და/ან დამატებ(ებ)ის ასახვა/შეტანა, თუ ეს ცვლილებ(ები) და/ან დამატებ(ები) შეესაბამება საქართველოს მოქმედ კანონმდებლობას და არ ეწინააღმდეგება პროგრამის მიზნებსა და ამოცანებს.

3. დაევალოს დასაქმების პროგრამების დეპარტამენტს: (მ. ბეზარაშვილი)
ა) კოორდინაცია გაუწიოს სააგენტოს ტერიტორიული ერთეულების საქმიანობას ამ ბრძანებით დამტკიცებული ღონისძიებების განხორციელებაში;

ბ) წარმოადგინოს ბრძანების პროექტი „დასაქმების ხელშეწყბის მომსახურებათა განვითარების სახელმწიფო პროგრამის" სამუშაო ადგილების სუბსიდირების კომპონენტის მიმდინარეობის ინსპექტირების ჯგუფის შემადგენლობის და აუცილებლობის შემთხვევაში, პროგრამის ადმინისტრირებისათვის საჭირო დამატებითი ღონისძიებების დამტკიცების შესახებ;

გ) საქართველოს შრომის, ჯანმრთელობისა და სოციალური დაცვის სამინისტროსთვის წარსადგენად, პროგრამის განხორციელების შესახებ შუალედური და საბოლოო ანგარიშების მომზადება;

დ) პროგრამით სააგენტოსათვის განსაზღვრული სხვა მოთხოვნების შესასრულებლად საჭირო ღონისძიებების გატარება.
4. სააგენტოს ტერიტორიული ერთეულების უფროსებს და/ან მათ მოადგილეებს, ხოლო ქალაქ თბილისის მასშტაბით სერვის-ცენტრის უფლებამოსილ პირებს მიენიჭოთ უფლებამოსილება, სააგენტოს სახელით ხელი მოაწერონ ამ ბრძანების პირველი პუნქტით გათვალისწინებულ დოკუმენტებს (ვაუჩერი, მიმწოდებელთან ხელშეკრულება, შეთანხმება).

5. სააგენტოს ადმინისტრაციულმა დეპარტამენტმა (გ. გოგოლაძე) უზრუნველყოს, ამ ბრძანების დოკუმენტბრუნვის ელექტრონული სისტემით („დეს“) სააგენტოს სტრუქტურული და ტერიტორიული ერთეულებისათვის გაგზავნა.

6. სააგენტოს დირექტორის აპარატმა (ნ. ჩანადირი) უზრუნველყოს, საჯარო გაცნობის მიზნით, ამ ბრძანების სააგენტოს ვებ–გვერდზე (www.ssa.gov.ge) განთავსება.

7. ბრძანება ამოქმედდეს ხელმოწერისთანავე.

სსიპ – სოციალური მომსახურების სააგენტოს დირექტორი, საქართველოს შრომის, ჯანმრთელობისა და სოციალური დაცვის მინისტრის მოადგილე

ზაზა სოფრომაძე