დედათა და ბავშვთა ჯანმრთელობის სახელმწიფო პროგრამით გათვალისწინებული ანტენატალური მეთვალყურეობის მომსახურების რეალიზაციასთან დაკავშირებული ზოგიერთი ღონისძიების შესახებ

„2012 წლის ჯანმრთელობის დაცვის სახელმწიფო პროგრამების დამტკიცების შესახებ“ საქართველოს მთავრობის 2012 წლის 15 მარტის N92 დადგენილებით დამტკიცებული „დედათა და ბავშვთა ჯანმრთელობის“ სახელმწიფო პროგრამის მე-8 მუხლის მე-2 პუნქტის გათვალისწინებით და საქართველოს შრომის, ჯანმრთელობისა და სოციალური დაცვის მინისტრის 2007 წლის 27 ივნისის N190/ნ ბრძანებით დამტკიცებული „საჯარო სამართლის იურიდიული პირის – სოციალური მომსახურების სააგენტოს დებულების“ მე-4 მუხლის საფუძველზე,

1. დამტკიცდეს დედათა და ბავშვთა ჯანმრთელობის სახელმწიფო პროგრამით გათვალისწინებული მომსახურების – ანტენატალური მეთვალყურეობის მატერიალიზებული ვაუჩერის მიმოქცევისა და გაცემის წესი (დანართი N1).

2. ანტენატალური ვაუჩერის მისაღებად შემოსული განცხადებების და დოკუმენტების ერთპიროვნულად მიღების, განხილვის, ვაუჩერის ამობეჭდვის, შესაბამის გრაფაში ხელმოწერისა და გაცემის უფლებამოსილება, ამ ბრძანების პირველი პუნქტით დამტკიცებული წესის შესაბამისად, ენიჭებათ:

ა) სააგენტოს ცენტრალურ აპარატში მომართვისას - სააგენტოს საზოგადოებასთან ურთიერთობის სამმართველოს თანამშრომელს (თანამშრომლებს);

ბ) სააგენტოს ტერიტორიულ ერთეულებში მიმართვისას - ტერიტორიული ერთეულის ხელმძღვანელს ან მისი ბრძანებით განსაზღვრულ საამისოდ უფლებამოსილ პირ(ებ)ს.

3. დაწესებულების შეცვლის, შეწყვეტილი ორსულობისა და ვაუჩერის განმეორებით (დუბლიკატი) გაცემის შემთხვევაში, წარმოდგენილი განცხადებები და დოკუმენტაცია ექვემდებარება დოკუმენტბრუნვის ელექტრონულ სისტემაში (დეს) განთავსებას.

4. სააგენტოს ადმინისტრაციული დეპარტამენტის უფროსს, ლოჯისტიკის სამმართველოს მთავარ სპეციალისტს, გოჩა ქვრივიშვილს, საზოგადოებასთან ურთიერთობის სამართველოს უფროსს, აჭარის ავტონომიური რესპუბლიკის ფილიალის, რეგიონალური საკოორდინაციო ცენტრების, რაიონული (საქალაქო) განყოფილებების და სოციალური მომსახურების ცენტრების უფროსებს მიენიჭოთ უფლებამოსილება ხელი მოაწერონ ამ ბრძანების პირველი პუნქტით დამტკიცებული წესის შესაბამისად, სააგენტოს დირექტორის 2011 წლის 24 მარტის N04-17/ო ბრძანების პირველი პუნქტის „ა“ ქვეპუნქტით დამტკიცებული ანტენატალური მეთვალყურეობის ვაუჩერის მიმოქცევასთან დაკავშირებით გასაფორმებელ მიღება-ჩაბარების აქტებს.

5. აჭარის ავტონომიური რესპუბლიკის ფილიალის, რეგიონალური საკოორდინაციო ცენტრების, რაიონული (საქალაქო) განყოფილებების და სოციალური მომსახურების ცენტრების უფროსები უფლებამოსილნი არიან თავისი ბრძანებით განსაზღვრონ პირ(ებ)ი, რომელიც მათ ნაცვლად ხელს მოაწერს ამ ბრძანების მე-4 პუნქტით გათვალისწინებულ მიღება-ჩაბარების აქტ(ებ)ს.

6. აჭარის ავტონომიური რესპუბლიკის ფილიალისა და რეგიონალური საკოორდინაციო ცენტრების უფროსებს დაევალოთ:

ა) მათ სამოქმედო ტერიტორიაზე მდებარე რაიონულ (საქალაქო) განყოფილებებში და სოციალური მომსახურების ცენტრებში ვაუჩერის გაცემასთან დაკავშირებული შესაბამისი კომპიუტერული პროგრამისა და/ან შესაბამისი განახლებ(ებ)ის ინსტალირება;

ბ) მათ სამოქმედო ტერიტორიაზე მდებარე რაიონული (საქალაქო) განყოფილებების და სოციალური მომსახურების ცენტრების ინფორმირება (სწავლება) ვაუჩერის გაცემასთან დაკავშირებული საკითხების თაობაზე;

გ) გაუწიონ ზედამხედველობა, ვაუჩერის გაცემის პროცესს ამ ბრძანების შესაბამისად, მათ სამოქმედო ტერიტორიაზე მდებარე რაიონულ (საქალაქო) განყოფილებებში და სოციალური მომსახურების ცენტრებში;

დ) სააგენტოს სამედიცინო დაზღვევისა და ჯანმრთელობის დაცვის პროგრამების დეპარტამენტის მოთხოვნის საფუძველზე წარმოუდგინოს ანგარიში ვაუჩერის გაცემასთან დაკავშირებულ საკითხებზე.

7.  რაიონული (საქალაქო) განყოფილებების და სოციალური მომსახურების ცენტრების, ასევე ქალაქ თბილისის სოციალური მომსახურების ცენტრების უფროსებმა ბრძანებით განსაზღვრონ მათ დაქვემდებარებაში მყოფი თანამშრომელი, რომელიც უზრუნველყოფს ამ ბრძანების პირველი პუნქტით დამტკიცებული წესის შესაბამისად ვაუჩერების გაცემასთან დაკავშირებული ღონისძიებების გატარებას.

8. საზოგადოებასთან ურთიერთობის სამმართველო, აჭარის ავტონომიური რესპუბლიკის ფილიალი და რეგიონალური საკოორდინაციო ცენტრები ვალდებულნი არიან მინიმუმ 10 სამუშაო დღით ადრე წარმოადგინონ მოთხოვნა დამატებითი ვაუჩერების გამოყოფის თაობაზე.

9. მოქმედი კანონმდებლობით და წინამდებარე ბრძანებით დამტკიცებული წესის შესაბამისად ვაუჩერის გაცემაზე პასუხისმგებლობა ეკისრება სააგენტოს შესაბამის სტრუქტურულ და ტერიტორიულ ერთეულს, რომელმაც განახორციელა ვაუჩერის გაცემა.

10. ადმინისტრაციამ (ზ. გუნცაძე) უზრუნველყოს:

ა) ბეჭდური წესით დამზადებული, ანტენატალური მეთვალყურეობის მომსახურებისათვის მატერიალიზებული ფორმის ვაუჩერის გადაცემა საზოგადოებასთან ურთიერთობის სამმართველოსათვის, აჭარის ავტონომიური რესპუბლიკის ფილიალისათვის, რეგიონალური საკოორდინაციო ცენტრებისათვის და ქ. თბილისის სოციალური მომსახურების ცენტრებისათვის;

ბ) ქ. თბილისის სოციალური მომსახურების ცენტრებში ანტენატალური მეთვალყურეობის მომსახურების ვაუჩერის გაცემასთან დაკავშირებით შესაბამისი კომპიუტერული პროგრამის ინსტალირებისათვის საჭირო ღონისძიებების გატარება;

გ) სააგენტოს ვებ-გვერდზე გაუქმებული ვაუჩერების ნუსხის ატვირთვა/განახლებისათვის საჭირო ღონისძიებების გატარება;

დ) წინამდებარე ბრძანების გადაცემა სააგენტოს სტრუქტურული და ტერიტორიული ერთეულებსითვის.

11. სსიპ სოციალური მომსახურების სააგენტოს სამედიცინო დაზღვევისა და ჯანმრთელობის დაცვის პროგრამების დეპარტამენტმა უზრუნველყოს წინამდებარე ბრძანებისა და ამ ბრძანებაში შეტანილი ნებისმიერ ცვლილებ(ებ)ის გაცნობა მიმწოდებლებისათვის.

12. ძალადაკარგულად გამოცხადდეს „დედათა და ბაშვთა ჯანმრთელობის სახელმწიფო პროგრამით გათვალისწინებული ანტენატალური მეთვალყურეობის მომსახურების რეალიზაციასთან დაკავშირებული ზოგიერთი ღონისძიების შესახებ“ სსიპ – სოციალური მომსახურების სააგენტოს 2011 წლის 5 აპრილის N04-45/ო ბრძანება.

13. ბრძანება ძალაშია 2012 წლის 1 აპრილიდან.

სსიპ – სოციალური მომსახურების სააგენტო, სსიპ – სოციალური მომსახურების სააგენტოს დირექტორი

რამაზ სულამანიძე