• ბიძინა ივანიშვილმა ზუსტად დ ა სიღრმისეულად შეაფასა ქვეყანაში მიმდინარე პოლიტიკური პროცესები. ის შეეხო პრაქტიკულად ყველა გამოწვევას, რაც ჩვენი ქვეყნისა და მოქალაქეების წინაშე დგას.
• ბიძნა ივანიშვილმა ვრცლად ისაუბრა ბოლო პერიოდში განვითარებულ მოვლენებსა და პროპორციულ არჩევნებთან დაკავშირებულ საკითხებზე. ინტერვიუში მკაფიოდ იყო აღნიშნული, რომ პროპორციული სისტემით არჩევნების 2020 წელს ჩატარება „ქართული ოცნების“ ცალმხრივი დაპირება და კეთილი ნება იყო, თუმცა ოპონენტების მხრიდანიყო მცდელობა გაფორმებულიყო, როგორც ხელისუფლებისთვის პროპორციული არჩევნების გამოტაცება, თითქოს ეს ასეც უნდა ყოფილიყო. ამის საპასუხოდ, შემხვედრი ნაბიჯების ნაცვლად, დესტრუქციული ოპოზიცია 3 თვე ქუჩიდან არ გასულა, მუდმივად ძალადობაზე იყო ორიენტორებული და შეურაცხყოფის კამპანიაც კი აწარმოა, რამაც პროპორციული არჩევნების ინიციატივაზე, გუნდში არსებულ მყიფე კონსენსუსზე, ნეგატიურად იმოქმედა. შესაბამისად, თავისუფალი კენჭისყრის შედეგად, დადგა ის შედეგი, რაც დადგა.
• ინტერვიუში, ბიძინა ივანიშვილმა საზოგადოებას ის ფაქტიც შეახსენა, რომ სწორედ „ქართული ოცნებაა“ ის პოლიტიკური ძალა, რომელმაც 2024 წელს პროპორციულ საარჩევნო სისტემაზე გადასვლა კონსტიტუციაში ასახა. ხოლო ოპონენტები, რომლებიც დაუყოვნებლივ მოითხოვენ პროპორციულ არჩევნებს, სრულიად ალოგიკურად ამტკიცებენ, თითქოსდა შერეული საარჩევნო სისტემა უსამართლო იყოს;
მათივე ლოგიკით გამოდის, რომ ხელისუფლებაში ყოფნის დროს, „ნაციონალური მოძრაობა“ 9 წელი (მისი წინამორბედი ხელისუფლებაც) არჩევნებს მუდმივად უსამართლო სისტემით ატარებდა.
• ბიძინა ივანიშვილის განცხადებით- დღეს ის პოლიტიკური ძალა ბედავს სამართლიან არჩევნებსა და პროპორციულ სისტემაზე ლაპარაკს, რომელმაც 9 წლის მანძილზე არჩევნები ტერორის ფონზე ჩაატარა, ხოლო პროპორციული სისტემის დასაბლოკად ყველა შესაძლო ხერხი გამოიყენა, მათ შორის რეფერენდუმის შედეგების გადახედვაც მაჟორიტარი დეპუტატების რაოდენობის გაზრდის სასარგებლოდ.
სწორედ „ნაციონალური მოძრაობაა“ მისი განშტოებებით ის ძალა, რომელმაც ბოლო საკონსტიტუციო ცვლილებებს, სადაც პროპორციულ საარჩევნო სისტემაზე გადასვლის საკითხი იდგა, ბოიკოტი გამოუცხადა და ჩვეული დესტრუქციით განაგრძო ვიწროპარტიული ინტერესების გატარება.
• „ქართული ოცნების“ თავმჯდომარემ აღნიშნა ისიც, რომ მმართველი პარტიის უპრეცედენტო ინიციატივის ჩავარდნის ფაქტი სამწუხაროა, თუმცა, ამით გამოუსწორებელი არაფერი მომხდარა; ხოლო მოსახლეობა, ამ ფაქტთან დაკავშირებით, საკუთარ დამოკიდებულებას არჩევნებზე დააფიქსირებს.
• მეორე მნიშვნელოვანი საკითხი, რომელსაც ბიძინა ივანიშვილი ინტერვიუში შეეხო, ქართული პოლიტიკური სპექტრის სუსტი მხარეებია. მან ძალიან საინტერესო ანალიზი შემოგვთავაზა და არსებული ვითარების სტრუქტურულ მიზეზებთან ერთად, ის ფაქტორიც დაასახელა, რომ პოლიტიკურ სპექტრს ძირითადად სამშობლოს სიყვარულისგან დაცლილი, გაკოტრებული პოლიტიკოსები წარმოადგენენ. არადა, მისი განმარტებით, მთავარი სწორედ სამშობლოს სიყვარულია, ხოლო სახელმწიფო ჩვენი ეროვნული ღორებულებებისა და ფასეულობების დამცველი, განმავითარებელი ინსტიტუტების ერთობლიობაა.
• მმართველი პარტიის თავმჯდომარემ რიგი არასამთავრობო, თუ კვლევითი ორგანიზაციების ტენდენციურ დამოკიდებულებაზეც ისაუბრა, რომლებიც, სამწუხაროდ, ქვეყანაში მიმდინარე მოვლენებს, „ნაციონალური მოძრაობის“ ნარატივის მიხედვით აფასებენ.
მან ასევე ხაზი გაუსვა საქართველოსა და ჩვენი ქვეყნის მთავარი სტრატეგიული პარტნიორის - აშშ-ს ურთიერთობას და ავტორიტეტული ამერიკული კვლევითი ორგანიზაციების როლს, თუმცა ისიც დასძინა, რომ სამწუხაროდ, ამ ორგანიზაციების კვლევით, საველე სამუშაოებს, „ნაციონალურ მოძრაობასთან“ აფილირებული ორგანიზაციები თუ პირები ასრულებენ. შესაბამისად, კვლევის შედეგები საზოგადოების რეალურ განწყობებს არ ასახავს, მათ მიმართ საზოგადოებაში ნიჰილისტურ დამოკიდებულებას აღვივებს, რაც საქართველოსა და აშშ-ს სტრატეგიული პარტნიორობის ინტერესებში ნამდვილად არ ჯდება.
• მან ასევე მკაფიოდ აღნიშნა, რომ ყველაზე დიდი დანაშაული, რაც „ნაციონალურმა მოძრაობამ“ ჩაიდინა, ჩვენი ქვეყნის ტერიტორიების 20%-ის ოკუპაციაა. დღეს კი ის ძალა, რომელმაც პრაქტიკულად რუსული ჯარი საქართველოში შემოიყვანა, ბორდერიზაციის კუთხით არსებულ გამოწვევებს და ლამის თავად ოკუპაციის ფაქტსაც, ბედავს და აქეთ აბრალებს „ქართული ოცნებას“.
• ბიძინა ივანიშვილმა მიმოიხილა საქართველოს დემოკრატიული განვითარების გზაც და ამ გზაზე, „ქართული ოცნების“ მიერ გადადგმული წარმატებული ნაბიჯები, რასაც პოზიტიურად აფასებენ ჩვენი საერთაშორისო პარტნიორები და ავტორიტეტული ორგანიზაციები, განსხვავებით ჩვენი ოპონენტებისგან, რომლებიც თეთრის შავად - შავის კი თეთრად გასაღებას ცდილობენ.
მისი თქმით, „ნაციონალურ მოძრაობას“ თეორიულადაც აღარ აქვს ხელისუფლებაში დაბრუნების შანსი და ვერცერთი საარჩევნო სისტემის პირობებში ვერ მოიპოვებს ხალხის მხარდაჭერას, შესაბამისად, მისი ერთადერთი შანსი დესტრუქცია და არეულობაა.
ბიძნა ივანიშვილის განცხადებით, მიუხედავად დესტრუქციის მცდელობისა, „ნაციონალური მოძრაობა“ ვერაფრის მიღწევას ვერ შეძლებს, რადგან სახელმწიფო ინსტიტუტები ეფექტურად, გამართულად მუშაობენ, სახელმწიფო თავის სიმაღლეზე დგას და ნებისმიერ კანონდარღვევას, კონსტიტუციური წესრიგიდან გასვლის მცდელობას, მყისიერი და ადეკვატური პასუხი გაეცემა.