- აშშ-სა და საქართველოს შორის ურთიერთობა დღეს უმაღლეს ნიშნულზეა და საქართველო სარგებლობს კონგრესის მტკიცე ორპარტიული მხარდაჭერით. ამის დასტური გახლავთ თუნდაც, წარმომადგენლობით პალატაში ერთხმად მიღებული საქართველოს მხარდამჭერი ორპარტიული აქტი, რაც თავისი ხასიათით არის უპრეცედენტო შინაარსის დოკუმენტი და შეიცავს საქართველოს მხარდაჭერის მნიშვნელოვან გზავნილებს
- რაც შეეხება კონკრეტული კონგრესმენის მალენის წერილს, როგორც ამ წერილიდან ჩანს მისი წუხილი დაკავშირებულია კერძო კომპანია ფრონტერასთან, რომელიც მრავალი წელია ოპერირებს ქართულ ბაზარზე.
- როგორც ცნობილია საქართველოს ნავთობისა და გაზის კორპორაციასა და კომპანია „ფრონტერას“ შორის კომერციული სახის დავა უკვე რამდენიმე წელია მიმდინარეობს. მხარეებს შორის დავის გადაუჭრელობის გამო, საქმე (ქართული მხარის ინიციატივით) განსახილველად გადაეცა ნეიტრალურ მხარეს - სტოკჰოლმის საარბიტრაჟო სასამართლოს, რომელსაც ამ საქმეზე ჯერჯერობით არ გამოუტანია გადაწყვეტილება. გადაწყვეტილების გამოტანამდე კომპანია „ფრონტერა“ კვლავინდებურად, შეუფერხებლად აგრძელებს საქმიანობას მხარეებს შორის გაფორმებული შეთანხმების სრული დაცვით.
- ბუნებრივია სტოკჰოლმის საარბიტრაჟო სასამართლო წარმოადგენს ამ დავის ყველაზე მიუკერძოებელი და სამართლიანად გადაჭრის ეფექტურ გზას.
- თავის მხრივ საქართველოს მთავრობა, ნებისმიერი კომპანიისთვის, ისევე როგორც „ფრონტერასთვის“ უზრუნველყოფს ბიზნესის წარმოებისათვის თანაბარ და მაქსიმალურად ხელსაყრელ გარემოს. ამის მკაფიო დასტურია ამჟამად საქართველოში წარმატებით მოქმედი 200-მდე ამერიკული კომპანია და ასევე საქართველოსა და აშშ-ს შორის ვაჭრობის მზარდი დონე.
- ამაზე მიუთითებს ასევე 28 კონგრესმენის წერილი ამერიკის სავაჭრო წარმომადგენლისადმი, სადაც, სწორედ რომ ქვეყანაში განხორციელებული დემოკრატიული და ეკონომიკური რეფორმებია დასახელებული მთავარ მიზეზად საქართველოსთან თავისუფალი ვაჭრობის შეთანხმების გაფორმებისთვის.
- საქართველოს წარმატებულ ეკონომიკურ გარემოსა და დემოკრატიულ განვითარებაზე მიუთითებს ასევე არაერთი საერთაშორისო ორგანიზაციის დასკვნები. მათ შორის ბიზნესის კეთების სიმარტივის კუთხით საქართველო, ყველა ევროპულ ქვეყანას უსწრებს და მსოფლიოში მე-7 ადგილზეა.
- ბუნებრივია ჩვენთვის მნიშვნელოვანია ჩვენი ამერიკელი პარტნიორების პოზიცია და თუნდაც ერთი კონკრეტული კონგრესემნის მოსაზრება. ამიტომ მზად ვართ ვიმუშაოთ როგორც კონგრესმენ მალენთან, ისე სხვა დაინტერესებულ მხარესთან იმისათვის რომ მათ მივაწოდოთ ობიექტური ინფორმაცია ქვეყანაში არსებული ვითარების და ამ კონკრეტული საქმის შესახებ.
- აშშ ყოველთვის იყო და რჩება საქართველოს დემოკრატიული განვითარების მხარდამჭერად, დემოკრატიის განმტკიცების მიმართულებით სახელმწიფოს მიერ გადადგმული ნებისმიერი ნაბიჯი და რეფორმა სწორედ რომ ჩვენს პარტნიორებთან, მათ შორის უმთავრესად ჩვენს სტრატეგიულ პარტნიორთან მჭიდრო კოორდინაციით ხორციელდება.
- საზოგადოებას ასევე შევახსენებთ რომ კომპანია ფრონტერასთან დაკავშირებით წარსულშიც არაერთხელ არსებობდა მსგავსი სახის ინიციატივები (მათ შორის 2019 წლის თებერვალში ინიცირებული რეზოლუციის პროექტი, მანამდე კი 2017 წელს ინიცირებული რეზოლუცია), რომელიც არასიცოცხლისუნარიანი იყო და შემდგომი განხილვებიც კი არ მოჰყოლია.
- ზოგადად საქართველოს პარტნიორობა აშშ-სთან სწორედ რომ ქართული ოცნების ხელისუფლების პირობებში უფრო გამყარდა და განმტკიცდა, მოიპოვა მეტი სანდოობა, რასაც მოწმობს აშშ-ს მხრიდან საქარტველოსთან თავდაცვისა და უსაფრთხოების სფეროში არსებული მაღალი დონის თანამშრომლობა.
- ჩვენი საზოგადოება სამწუხაროდ იმის მოწმეც არის, რომ ქართული ოპოზიციური სპექტრი საკუთარი პოლიტიკური ინტერესებიდან გამომდინარე ხშირად არ ერიდება საკუთარი სახელმწიფოსთვის ზიანის მიყენებას და არაობირქტური ინფორმაციით კვებავს პარტნიორ ქვეყნებში ცალკეულ პოლიტიკოსებს, ამერიკელი კონგრესმენის მსგავსი აღქმა საქართველოსთან დაკავშირებით, არ არის გამორიცხული რომ მათ მიერ გავრცელებული ცალმხრივი ნარატივის შედეგიც იყოს.
დამატებით კონგრესმენ მალენის წერილში მოყვანილი მაგალითის ფაქტობრივ უზუსტობასთან დაკავშირებით:
- ამასთან, კონგრესმენ მალენის განცხადებები საქართველოსთან დაკავშირებით აშშ-ის კონსოლიდირებული ასიგნებების აქტთან მიმართებით არის არასწორი. აღნიშნულ კანონში, ერთის მხრივ, გაწერილია ბიუჯეტის პარამეტრები, რაც ითვალისწინებს აშშ-სთვის მნიშვნელოვანი პარტნიორი ქვეყნების მხარდაჭერას და ასევე დაფიქსირებულია ის მნიშვნელოვანი ჩანაწერები, რომლებიც წარმოადგენს სახელმძღვანელო პრინციპებს აშშ-ს ადმინისტრაციისთვის. ხსენებულ აქტში ორივე მიმართულებით საქართველო ფიგურირებს როგორც აშშ-ს მნიშვნელოვანი პარტნიორი ქვეყანა. კერძოდ:
- 2020 ფისკალური წლის აშშ-ს ასიგნებების აქტში/ბიუჯეტში საქართველოსთვის გათვალისწინებული დაფინანსების მნიშვნელოვანი ზრდა და მხარდამჭერი ჩანაწერის შენარჩუნება (ზედიზედ მეოთხე წელი) წარმოადგენს როგორც აშშ-ის კონგრესის, ისე ადმინისტრაციის მხრიდან საქართველოს სუვერენიტეტის, ტერიტორიული მთლიანობის, ქვეყნის თავდაცვისუნარიანობის გაძლიერებისა და აშშ-საქართველოს სტრატეგიული პარტნიორობის გაღრმავების მიმართ, კიდევ ერთ მკაფიო მხარდაჭერას;
- უნდა აღინიშნოს რომ აშშ-ს საბიუჯეტო კანონში (კონსოლიდირებული ასიგნებების აქტში) საქართველოს მხარდამჭერი ჩანაწერი პირველად 2017 წელს, ტრამპის ადმინისტრაციის პირობებში გაჩნდა და მას შემდეგ ჩვენი ერთ-ერთი მთავარი ამოცანა კონგრესთან მუშაობის თვალსაზრისით არის სწორედ ამ მხარდამჭერი ჩანაწერების შენარჩუნება, რაც მიღწეული იქნა და საქართველო ფიგურირებს აშშ-ს ერთ-ერთი ყველაზე მნიშვნელოვან საკანონმდებლო აქტში.
- 2020 წლის აქტში საქართველოსთვის განკუთვნილი თანხა მნიშვნელოვნად გაზრდილია და 132 025 000 მლნ აშშ დოლარს შეადგენს, რაც საქართველოსა და აშშ-ის ურთიერთობების მანძილზე ყველაზე მაღალ ნიშნულს წარმოადგენს.