პრემიერ-მინისტრ გიორგი გახარიას ვიზიტის შედეგები დავოსის მსოფლიო ეკონომიკურ ფორუმზე:

 ·         დავოსის მსოფლიო ეკონომიკური ფორუმი საერთაშორისო ფორმატია, სადაც ეკონომიკური საკითხების გარდა, ბიზნესლიდერები, პოლიტიკოსები და სამოქალაქო საზოგადოების წარმომადგენლები გლობალურ, აქტუალურ საკითხებს განიხილავენ. მისასალმებელია, რომ პრემიერ-მინისტრმა გიორგი გახარიამ, დავოსში, როგორც ეკონომიკური, ისე პოლიტიკური თვალსაზრისით, ძალიან წარმატებული შეხვედრები გამართა.

·         პრემიერ-მინისტრის მეთაურობით, საქართველოს სამთავრობო დელეგაციამ, შეხვედრები გამართა  კოლეგებთან, ევროპელ პარტნიორებსა და მეზობელი ქვეყნების ლიდერებთან, სადაც განიხილეს საქართველოს ევროპული მისწრაფებები, უსაფრთხოების საკითხები, ოკუპაციის პრობლემა,  საოკუპაციო ხაზზე არსებული ვითარება.

·         მნიშვნელოვანია, რომ შეხვედრებზე ჩვენმა პარტნიორებმა საქართველოში დემოკრატიზაციის კუთხით არსებული პროგრესის შესახებ კიდევ ერთხელ ხაზგასმით აღნიშნეს. მათ შორის ისინი აცხადებენ, რომ ყურადღებით დააკვირდებიან საარჩევნო პროცესს, რომლის სამაგალითოდ ჩატარების მოლოდინიც აქვთ, რაც, რა თქმა უნდა, ჩვენი პასუხისმგებლობაა და ამისთვის აბსოლუტურ მზადყოფნაში ვართ.

·         ასევე, განსაკურებით მნიშვნელოვანია, რომ ჩვენმა დასავლელმა პარტნიორებმა ხაზგასმით აღნიშნეს, რომ საქართველოს შეუძლია დიდი წვლილი შეიტანოს ევროპის უსაფრთხოებაში, განსაკუთრებით კი შავი ზღვის კონტექსტში. მათი შეფასებით, 2019 წლის ჩვენი შედეგები ნატო-საქართველოს თანამშრომლობაში მართლაც შთამბეჭდავია.

·         როგორც პრემიერმა ფორუმის დასრულებისას აღნიშნა, 2020 წელს, 10 წლის თავზე, აღმოსავლეთ პარტნიორობის ქვეყნებისთვის ჩამოყალიბდება ახალი ხედვა, რომელიც განსაზღვრავს, თუ როგორ განვითარდება ინტეგრაციის პროცესი და რომელიც, შესაძლებლობის გაჩენისთანავე, დასრულდება ფაქტობრივი ინტეგრაციით. სწორედ ეს იყო ესტონეთის, ლიეტუვას, ლატვიის, ხორვატიის პრეზიდენტებსა თუ პრემიერებთან, საქართველოს მთავრობის მეთაურის შეხვედრების ძირითადი თემები.

·         ასევე, ძალიან მნიშვნელოვანია, რომ დავოსში გამართულ შეხვედრებზე ტრანსნაციონალურმა ფინანსურმა კორპორაციებმა, საქართველოს ფინანსური მდგომარეობა პოზიტიურად შეაფასეს, რაც პირდაპირ ნიშნავს, რომ საქართველოში ინვესტიციების განხორციელების კუთხით, მათთვის სანდო და ხელსაყრელი გარემოა.

·         ვიზიტის ფარგლებში მთავრობის მეთაურმა პირადი შეხვედრები გამართა ევროპულ და ამერიკულ უმსხვილეს კომპანიებთან, რომლებიც დაინტერესებულნი არიან საქართველოში ინვესტიციების განხორციელებით და რომელთა შემოსვლასაც ძალიან დიდი მნიშვნელობა აქვს დამატებითი სამუშაო ადგილების შექმნისა და ქვეყანის შემდგომი ეკონომიკური განვითარებისთვის.

დამატებითი ინფორმაცია დავოსში პრემიერ-მინისტრის მიერ გამართული შეხვედრების შესახებ:

·         მთავრობის მეთაურმა შეხვედრა გამართა „კოკა-კოლას” ვიცე-პრეზიდენტთან, რომელმაც საქართველოში განსახორციელებელ კონკრეტულ საინვესტიციო გეგმებზე და მიმდინარე პროექტებზე ისაუბრა. იგეგმება ახალი ქარხნის გახსნა წეროვანში, რომელიც დამატებით 1500 მდე ადამიანს დაასაქმებს, ინვესტიციის მოცულობა  კი 20 მლნ აშშ დოლარია.

·         ასევე, შეხვედრა გაიმართა “Citi Bank”-ის წარმომადგენლებთან, რომლებთან ერთადაც განიხილეს საქართველოს ფინანსური სექტორის მდგრადობა და შემდგომი განვითარების პერსპექტივა, იმ რეფორმების შედეგად, რომლებიც ფინანსურ სექტორში მიმდინარეობს.

·         შეხვედრები გაიმართა ენერგეტიკის სექტორის მსხვილ კომპანიებთან. პრემიერის განცხადებით, საქართველო ენერგეტიკის სფეროში ბაზრის ლიბერალიზაციის რეფორმას ატარებს, რაც დიდ ინტერესს იწვევს კომპანიებში, რომლებსაც დიდი გამოცდილება და სურვილი აქვთ, რომ საქართველოში ახალი პროექტები განახორციელონ.

·         საქართველოს დელეგაციისა და შვეიცარული შოკოლადის მწარმოებელ “Chamille Bloch”-თან გამართულ შეხვედრაზე ცნობილი გახდა, რომ კომპანიას უკვე შერჩეული აქვს საქართველოში 650 ჰექტარი მიწა, რომელზეც თხილის პლანტაციების პროექტს განახორციელებს. მთავრობა მზადაა ამ მასშტაბური პროექტის განხორციელებისთვის მაქსიმალურად ხელი შეუწყოს კომპანიას.

·         ბულგარეთის პრემიერ-მინისტრთან, ბატონ ბორისოვთან შეხვედრისას მიღწეულია შეთანხმება, რომ მნიშვნელოვნად გაიზარდოს კომუნიკაცია ბულგარეთსა და საქართველოს შორის შავ ზღვაზე საბორნე მიმოსვლით. გარდა ამისა, ოპტიკურ-ბოჭკოვანი კავშირის კუთხით, იგეგმება ახალი შესაძლებლობების განვითარება, რისთვისაც საჭიროა ჩვენს ქვეყნებს შორის ძალისხმევის გაერთიანება, ევროკავშირის თანამონაწილეობის უზრუნველსაყოფად.

·         საქართველოს პრემიერმა ლიეტუვის პრეზიდენტისგან მიიღო რწმუნება, რომ იგი მაქსიმალურად დაგვიდგება გვერდში აღმოსავლეთ პარტნიორობის მომავლის ხედვის განსაზღვრაში, რაც, უმნიშვნელოვანესი ფორმატია ჩვენი ევროკავშირში ინტეგრაციის გზაზე.  

·         საინტერესო შეხვედრა გაიმართა მთავრობის მეთაურსა და მის ესტონელ კოლეგას შორის. განსაკუთრებით ხაზგასასმელია ესტონურ მხარესთან თანამშრომლობა განათლების სფეროში, ციფრული ტექნოლოგიების მიმართულებით. შეხვედრისას საუბარი შეეხო დიგიტალიზაციის მიმართულებით თანამშრომლობის აუცილებლობასაც.

·         რაც შეეხება ხორვატიის პრემიერ-მინისტრთან შეხვედრას, გიორგი გახარიამ იგი საქართველოში ოფიციალური ვიზიტით დაპატიჟა. აღსანიშნავია, რომ ხორვატია არის ევროპის კავშირის საბჭოს თავმჯდომარე ქვეყანა, რომლის პირობებშიც ტარდება აღმოსავლეთის პარტნიორობის სამიტი. შეხვედრაზე მხარეები შეთანხმდნენ, რომ ქვეყნებს შორის ამ მიმართულებით თანამშრომლობა გაღრმავდება, რათა ეს სამიტი მაქსიმალურად პროდუქტიული და შედეგის მომტანი იყოს საქართველოსთვის და, ზოგადად, აღმოსავლეთ პარტნიორი ქვეყნებისთვის. ხორვატ კოლეგასთან საუბარი ასევე შეეხო ცირკულარული მიგრაციის მიმართულებით თანამშრომლობის პერსპექტივებსაც.