• Covid-19-ის გლობალური გამოწვევა მძიმედ აისახება, როგორც თითოეულ მოქალაქეზე, ასევე ქვეყნის ეკონომიკაზე.
• ხელისუფლების ბრძოლა ქვეყანაში Covid-19-ის გავრცელების წინააღმდეგ სწორედ იმიტომ იქნა აღიარებული წარმატებულად, რომ ჩვენ ჯერ კიდევ ვირუსის პირველი შემთხვევის დაფიქსირებამდე ერთი თვით ადრე გადავდგით პრევენციული ნაბიჯები და მას შემდეგ დაწესებული თითოეული შეზღუდვა თუ აკრძალვა, პროცესის თანმიმდევრულია, გეგმის შესაბამისად მართვა კი სპეციალისტების რჩევებზე, მათი წინასწარი ანალიზის საფუძველზეა დაფუძნებული.
• სწორედ ამის შედეგია, რომ ამ დროისთვის ქვეყანაში კორონავირუსის 408 დადასტურებული შემთხვევაა და არა ბევრად მეტი. ფართოვდება კლასტერები და შესაბამისად, სულ უფრო რთულდება ინფიცირების წყაროს მიკვლევა.
• ქვეყანა სრულმასშტაბიანი შიდა გავრცელების ეტაპზეა. დღეს უკვე სპეციალისტები ანალიზის საფუძველზე პროგნოზირებენ, რომ მიმდინარე 2-3 კვირის განმავლობაში, ვირუსის გავრცელების ყველაზე აქტიურ - პიკურ ფაზაში ვიქნებით.
• დღეს ხელისუფლების მოქმედებას კიდევ უფრო მეტი მნიშვნელობა აქვს. ამიტომ, უნდა გავაგრძელოთ იმ აუცილებელი ნაბიჯების გადადგმა, რომლითაც ქვეყანა ვირუსის მასიური გავრცელების შენელებას განაგრძობს, რათა ამ ფაზას ლოგიკურად მოვაყოლოთ ეტაპობრივი ე.წ. გახსნის ფაზა, რაც დაწესებული შეზღუდვების ნაბიჯ-ნაბიჯ, თანმიმდევრულ მოხსნას გულისხმობს. ეს ფაზაც უნდა იყოს სწორედ ეტაპობრივი და ეს აუცილებელია პროცესის ისევე წარმატებულად გაგრძელებისთვის, როგორც აქამდე მოვედით.
• საგანგებო მდგომარეობის გაგრძელება არ ნიშნავს იმას, რომ ამ პერიოდში შეუძლებელი იქნება დაწესებული რიგი შეზღუდვების ეტაპობრივი მოხსნა.
• უკვე ორშაბათიდან, 27 აპრილიდან, დაიწყება გარკვეული შეზღუდვების, მათ შორის გადაადგილების შეზღუდვის მოხსნა. სპეციალისტების პროგნოზის გათვალისწინებით, 2-3 კვირის შემდეგ, პიკის გადალახვის შემთხვევაში, აქტიურად შევძლებთ დავიწყოთ შეზღუდვების მოხსნის გეგმის განხორციელება და ეკონომიკური ცხოვრების ეტაპობრივი გააქტიურება.
• დღეს, საბჭოს მიერ მიღებული იქნა გადაწყვეტილება და საქართველოს მთავრობამ გაუგზავნა ოფიციალური მიმართვა საქართველოს პრეზიდენტს, საგანგებო მდგომარეობის 22 მაისის ჩათვლით გაგრძელების თაობაზე. პრეზიდენტის მიერ საგანგებო მდგომარეობის გაგრძელების შესახებ ბრძანების გამოცხადებისთანავე გადაწყვეტილება შედის ძალაში, ხოლო შემდეგ ხდება პარლამენტის მიერ მისი დამტკიცება.
• ვირუსის მასობრივი გავრცელების და სისწრაფის შეფერხება ქვეყნის ჯანდაცვის სისტემას საშუალებას აძლევს, მომზადებული იყოს თითოეული მოქალაქის ხარისხიანად მკურნალობისთვის და წარმატებით გაუმკლავდეს ამ პროცესს.
• ჩვენი ძირითადი ამოცანაა, ერთდროულად ვიზრუნოთ მოქალაქეების ჯანმრთელობასა და ეკონომიკაზე, რათა ორივე მიმართულებით ვიყოთ ეფექტიანები და მინიმუმამდე დავიყვანოთ ზიანი, რომელიც ამ გლობალური გამოწვევისგან ადგება ქვეყანას.
• ხელისუფლება ეპიდემიასთან ბრძოლის პარალელურად ყოველდღიურ რეჟიმში მუშაობს ეკონომიკის ანტიკრიზისულ გეგმაზე, რომლის წარმოდგენაც ასევე ეტაპობრივად დავიწყეთ.
• პირველ ეტაპზევე გავატარეთ აუცილებელი ზომები. ესენია:
1. 3 თვის კომუნალური გადასახადების დაფარვა საქართველოს მოსახლეობისთვის;
2. 9 მთავარ სასურსათო პროდუქტზე ფასების დაზღვევა, რომ არ გაძვირებულიყო ისინი.
3. საგადასახადო შეღავათები დაუწესდა ბიზნესს;
4. 3 თვით მოხდა სესხების მომსახურების გადავადება მოქალაქეებისთვის და ბიზნესისთვის.
• შემდეგ ეტაპზე უკვე გამოჩნდა მთავრობის უპრეცედენტო მუშაობის მორიგი შედეგი, რაც საერთაშორისო პარტნიორებისგან დახმარების სახით, ქვეყნის ეკონომიკისთვის 3 მლრდ დოლარზე მეტის მოზიდვაში გამოიხატა.
• პარასკევს, 24 აპრილს კი, საქართველოს მთავრობა წარმოადგენს ეკონომიკური ანტიკრიზისული გეგმის შემდეგი ეტაპით გათვალისწინებულ ნაბიჯებს, რაც გულისხმობს:
1. მიზნობრივი სოციალური დახმარების ანტიკრიზისულ გეგმას;
2. ბიზნესის დახმარების ანტიკრიზისულ გეგმას;
• ამასთან, პარასკევსვე იქნება წარმოდგენილი შეზღუდვების თანმიმდევრული ეტაპობრივი შემსუბუქების, ე.წ. ეკონომიკის გახსნის გეგმა.
• აქტიურად გაგრძელდება მუშაობა უკვე პოსტკრიზისულ გეგმაზე.
• რაც უფრო ზედმიწევნით აღსრულდება დაწესებული შეზღუდვები, მით უფრო სწრაფად გახდება შესაძლებელი შემსუბუქების გეგმის განხორციელება, რომელიც მთავრობამ შეიმუშავა.
• თითოეული მოქალაქე ამ საკითხს უდიდესი პასუხისმგებლობით უნდა მოეკიდოს. გვესმის, რომ რთულია შეზღუდულ პირობებში და გარემოში ცხოვრება, მაგრამ ამ პერიოდის განმავლობაში, რაც უფრო ზედმიწევნით იქნება დაცული ეს რეკომენდაციები, მით მალე დავუბრუნდებით ცხოვრების ჩვეულ რიტმს. ამიტომ, გავუფრთხილდეთ საკუთარ თავს, გავუფრთხილდეთ სხვებს და გავუფრთხილდეთ ჩვენი ქვეყნის მომავალს.
• საკოორდინაციო საბჭოს გადაწყვეტილებით, ავტომობილებით მიმოსვლის აკრძალვა გაგრძელდება კვირის ჩათვლით, ორშაბათამდე - 27 აპრილამდე.
• გვესმის ჩვენი მოქალაქეების, რომლებიც შეზღუდვების პერიოდშიც ხედავენ ავტომობილების გადაადგილებას ქუჩაში. აღნიშნული შეზღუდვა არ ეხება სამედიცინო სექტორის წამომადგენლებს, საკვებისა და სასურსათო ობიექტების, ადგილზე მიტანის სერვისების თანამშრომლებს, ასევე, ინფრასტრუქტურული სამუშაოების განმახორციელებელ სუბიექტებს და სხვა იმ ფიზიკურ თუ იურიდიულ პირებს, რომელთა საქმიანობაც, მათ შორის ეკონომიკური, დაშვებულია საგანგებო მდგომარეობის ფარგლებში. ისინი გადაადგილდებიან სამსახურეობრივი მოვალეობის შესრულების მიზნით საოპერაციო შტაბის მიერ გაცემული დროებითი ნებართვის საფუძველზე.
Search Results
Web result with site linksww